Shillong, Lber 20
U nongïalam jong ka United Democratic Party (UDP), Bah Kyrmen Shylla bad uba dei ruh u Myntri ka Sorkar Jylla, u la ong ba kum ki nongshong shnong ki dei ban jied ïa u kyrtong na ka seng ‘riewlum sha ïingdorbar Lok Sabha namar un don ïa ka bor bad ka sur kaba jam ban kren ïa ki mat ka jylla.
“Wat la kiba bun ki ju ïakren ba kan nym don jingmut ban jied ïa ki kyrtong na ki seng ‘riewlum ban leit mihkhmat ïa ka jylla sha Delhi, hynrei ki dei ban sngewthuh pat ba dei tang ki nongmihkhmat na ki seng ‘riewlum kiba don ïa ka bor bad ka sur ba jam ban pynpaw ïa ki jingeh hapoh ka dorbar Lok Sabha,” la ong u Bah Kyrmen Shylla haba kren bad u nongthoh khubor ha ka Sngi Balang.
“Ki paidbah ki dei ban sngewthuh ba wat la ki seng ri-thor ne kita ki National Party, ki long ki seng kiba heh bad kiba pynmih bun ki dkhot hapoh ka ïingdorbar Lok Sabha, hynrei ha kaba kut lada ka Meghalaya ka sei da ki MP na kita ki seng ri-thor, kin nym lah satia ban kren ïa ki jingeh ka jylla ne ban kren pyrshah ïa ki nongïalam jong ki,” u la ong. U Bah Kyrmen u la ong, lada jied ïa u MP na ka seng Congress, un hap ban kren beit ïa kaei kaba long hapoh ka seng bad un nym nud ban kren ïa ki jingeh ne ki mat ne kren pyrshah ïa ki nongïalam ne ïa u Rahul Gandhi, kumjuh ruh ki MP ka BJP kin nym nud ban kren pyrshah ïa u Narendra Modi ne Amit Shah na ka bynta ki jingeh ka jylla.
“Hynrei ngi kum ki seng ‘riewlum pat haba jop u kyrtong jong ngi, ngi ai lut ha u ïa ka bor ka iktiar ba un kren ha Parliament bad ban pynsawa jam ïa ka sur na ka bynta ki mat ki jura bad ki jingeh jong ka jylla ka jong ngi,” la ong u Bah Kyrmen. Une u nongïalam ka UDP u la ong ba u kyrtong ba la sei da ka UDP bad HSPDP ha ka kynhun jong ka Regional Democratic Alliance, kata u Bah Robertjune Kharjahrin, u la ong shisha uba tbit bad uba la don lypa ruh ka jingtip ha ka liang ki aiñ, kumta un long uba biang tam ban mihkhmat ïa ka jylla sha Parliament.
