Na Dhubri ha Assam, shah kem u heh duh ka ISIS ha India lem bad uwei pat

Shillong, Lber 20

Ki pulit ka Assam ha ka Sngi Balang ki la ïoh kem ïa u khlieh duh ka kynhun ISIS ha India ha ryngkat uwei pat u nongïalam kane ka kynhun pyntriem katba ki dang wan rung sha India na Bangladesh.

Katkum u kyrwoh khubor na u CPRO ka tnat pulit Assam, la ong ba katkum ka khubor na kiwei pat ki tnat syntiat, la ong ba kin don ar ngut ki heh ka ISIS ki ban wan rung sha India na kawei pat ka Ri na  ka bynta ban leh ïa ki kam pyntriem, bad kin poi ha ka thaiñ Dhubri.

Hadien ba la ïoh ïa katei ka jingtip, ki pulit Assam na ka STF ba la ïalam da u Parthasarathi Mahanta, IPS, uba long u IGP (STF), ryngkat bad kiwei pat ki heh pulit, ki la leit sha ka thaiñ Dhubri ban thwet bad kem ïa kitei ar ngut ki heh ka ISIS kiba la don ruh hapdeng ka jingshah thwet ha ka NIA.

U CPRO u la ong ba ki pulit ki la leit sha Dhubri ha ka por janmiet jong ka Sngi Ba-Ar, bad la pynlong ïa ka jingthwet kaba jur ha ka thaiñ khappud, bad dei tad haduh ka por 4:15 mynstep jong ka Sngi Balang ba ki pulit ki la ïoh bat ïa kitei ar ngut ha ka jaka ba la tip kum ka Dhannasala ha Dhubri hadien ba ki jam na Bangladesh.

Shuh shuh la ïathuh ba ïa kitei ar ngut kiba la shah kem, la wanrah sha ka shlem treikam jong ka STF ha Guwahati. La ong ba uwei na kiba la shah kem u dei ba la tip kyrteng kum u Haris Farooqi bad uba don ruh ïa ka kyrteng sin Harish Ajmal Farukhi na Chakrata, Dehradun ha Uttarakhand. La ong ruh ba u Haris Farooqi u dei u khlieh duh ka ISIS ha India.

Uwei pat uba la shah kem lang u dei ba la tip kyrteng kum u Anurag Singh bad uba don ïa ka kyrteng sin Rehan na Diawana, Panipat ha Haryana. La ong ba une u Anurag Singh u la kylla sha ka niam Islam bad u don ka kurim kaba dei ka nongshong shnong ka Bangladesh.

Nalorkata, u CPRO ka tnat pulit Assam u la ong ba u Haris Farooqi bad u Anurag Singh ki la ïaid bha ban pynsaphriang ïa ka nongrim jong ka ISIS ha India lyngba ki jingïasylla ban pynrung dkhot, jingbei tyngka na ka bynta ki kam pyntriem, bad ban leh ïa ki kam pyntriem da kaba pynbthei bom IED ha kiba bun ki jaka ha India.

La ong ruh ba ki don bun bah ki mukotduma pyrshah ïa kitei ar ngut ha ka NIA, Delhi bad ATS ha Lucknow.

Na ka liang ki pulit ka Assam kin sa aiti noh sha ka NIA khnang ba kan lah ban pynlong ïa ka jingtohkit kaba kham bniah pyrshah ïa kitei ar ngut.