Shillong, Lber 20
Ar ngut ki snar nongkhaïi drok kiba na jylla Tripura ki la shah kem noh ha ki pulit ka Anti Narcotics Task Force (AN TF) ka East Khasi Hills bad na ka met jong ki la ïoh ban kurup ïa u drok uba khia palat spah gram.
Katkum ka jingïathuh jong u Superintendent of Police (SP), East Khasi Hills la ong ba ki pulit ki la ïoh ïa ka jingtip kaba thikna halor kitei ar ngut ki nongkhaïi drok, bad mar kumta la pynlong ka jingkhynra hapoh ka jingïalam ka ophisar MPS ka Kong Sandra Nongdhar, ha kaba la ïoh ban kem ïa ki na ka thaiñ Happy Valley kaba hap hapoh ka thanat Madanrting.
Katkum ka jingtip ba la ai da u SP, la ong ba kine arngut ki dei ba la tip kyrteng kum u Joshua Khiangte Tripura, 36 snem uba sah ha Damchhara, Tripura bad u Joel Tripura, 29 snem na Kachharichara, Damchhara, North Tripura.
Na ka met jong kine ar ngut, ki pulit ANTF ki la ïoh ban kurup haduh 11 tylli ki synduk sabon ba la thep bha ïa u drok (heroin) uba don ka jingkhia haduh 139.98 gram, kawei ka Aadhaar Card, kawei ka PAN Card, kawei ka mobile phone bad la kurup ruh ïa ka kali Tata Sumo kaba don ïa u number ML05-N-0515.
Kumta, na ka liang jong ki pulit ki la pynrung da ka mukotduma hapoh ka NDPS Act ïa kine baroh ar ngut kiba shah kem bad ka jingtohkit mynta ka la ïaid shakhmat.
