Phah pyni u Bah Prestone ïa u Bah Ardent kiei kita ki jingpynkhreh ïa ka lawei

Shillong, Lber 20

U President ka National People’s Party (NPP) ha Meghalaya, Bah Prestone Tynsong, u la ther ïa u nongïalam ka Voice of People Party (VPP) uba ju kynnoh ïa ka Sorkar bad ïa ka NPP, bad u la ong ba u nongïalam ka VPP u dei ban pyni kiei kita ki jingpynkhreh (blueprint) jong u na bynta ka lawei, ym ban kren pynbiej ïa ki paidbah ha ka kyrteng ieid jaitbynriew namar u la dep long MLA mynta la 11 snem bad kiei ki kam kiba u la leh.

U Bah Prestone u pynpaw ïa kane haba kren sha ki lad pathai khubor ha ka Sngi Balang ha kaba u la ong ba u nongïalam ka VPP u Bah Ardent Basaïawmoit um don por shuh ban kren da kumwei pat hynrei tang ban kynthoh ïa ka Sorkar kaba ïalam da ka NPP bad kren tang shaphang ka mat ieid jaitbynriew bad ka lawei ban ktik ïa ka jingmut ki paidbah. Haba buh jingkylli ïa u Bah Ardent kum u MLA bad kum uba la don bad kiwei pat ki seng saiñ pyrthei ha ki snem ba la leit, u Bah Prestone u la ong, “Ha ki 10 snem mynshwa kum u MLA bad mynta shisnem kum u MLA, kiei ki kam ba phi la leh namar phi don por tang ban ïathuh ba phi ieid jaitbynriew kum ka phang pdeng.”

Une u nongïalam ka NPP u la buh jingkylli, katno tylli ki ki kam ba u Bah Ardent u la leh bad lada phai sha ki konstitwensi kiba ka VPP ka la jop, kiei ki kam ba ki la leh ha ki kam pynroi. U la ong ba hashwa ka ilekshon MLA 2023 ka NPP ka shah lynthem maw lyngba ki jingkynthoh bad ha kane ka sien kaba mynta ruh ha kane ka ilekshon MP ka jingkawang ktieh kaba la palat ïa ka NPP khamtam na ka VPP namar kim don por shuh ban kren da kumwei hynrei tang ban kynnoh bad pynthame paidbah. U la ong ba wat lada ki kynnoh ka NPP ka la jop na ka 19 sha ka 26 ngut ki MLA ha u snem 2023 bad ha kane ka ilekshon MP ruh ka Kong Ampareen Lyngdoh kum ka kyrtong kan ïoh jingjop namarba ka Sorkar ka trei ïa ki kam.

U Bah Prestone u la ong ruh ba ka bynta ka ba-ar ba ka VPP ka lapmiet ka long ban kynthoh ban kynnoh ba ka Sorkar MDA ka dei kaba tuh, kaba kumne-kumtai hynrei kine ki dei tang ki jingpynthame bad ki paidbah ruh ki dei ban da bishar ïa kum kine ki jingpynsngewthuh bakla.

Halor ka jingkren ka VPP shaphang ka lawei, u Bah Prestone u la ong ba ki kren shaphang ka lawei hynrei kim pyni kiei kita ki jingpynkhreh.

“Pyni ka blue print (jingpynkhreh) ïa ka lawei bad wat lapmiet ban kren tang ban shu ktik ïa ka jingmut jingpyrkhat ki paidbah namar mynta  la 11 snem kum u MLA, kiei kita ki kam kiba phi la leh, mynno bad hangno phi la leh?” la buh jingkylli u Bah Prestone.

U la pynkynmaw ruh ïa ka mat kaba ïadei bad ka aiñ thaw ïing lyngba ka Meghalaya Urban Development Authority (MUDA) ha u snem 2015 ha ka por ba long Myntri Rangbah u Dr Mukul Sangma ka khlem poi shano-shano, hynrei tad haduh u snem 2018 hapoh ka jingïalam u Bah Hamletson Dohïong kum u Myntri Sorkar bad la lah ban pynbeit ha kaba ki jaka ki hap noh ha ka jingpeit ki District Council katkum ka aiñ. Shuh shuh halor ka jingkren u Bah Ardent ba kiwei ki la phiel lut naduh ki seng saiñ pyrthei, sengbhalang, Dorbar Shnong bad kynthoh ïa ki nongïalam Balang, u Bah Prestone u la ong kum.kito ki jingkynthoh kiba ym lah ban pdiang namar u la kren salonsar ïa ka kyrdan jong ki kum ki nongïalam niam la kumba tang ki nongïalam ka VPP ki dei ki Angel lut.

U Bah Prestone u la ong ba u Bah Ardent ha ka por ba u don ha ka UDP u ong ba kum kane ka seng ym don shuh bad kumjuh ha ka por ba u don ha HSPDP kum u President hynrei u kren pat mynta ba ki dei kiba sniew lut.

Kumta une u nongïalam ka NPP u la ong ba ki paidbah ki dei ban husiar ïa kum kine ki jingkren pynthame u nongïalam ka VPP.