Shillong, Lber:
Ka National Health Mission jong ka sorkar jylla ha ka Sngi Ba-ar ka la pynlong jingrakhe ïa ka World TB Day 2024 halor ka phang pdeng, “Yes, we can end TB” ne “Hooid, ngi lah ban pynkit ïa ka TB”.
Hadien katei ka prokram ka la don ruh ka jingplie ïa ka C&DST Lab ha R.P. Chest Hospital Compound, Shillong.
Ki nongshah khot sngewbha ha katei ka sngi ki long u Ram Kumar S, IAS, Mission Director NHM & Secretary ka tnad Koit-Khiah, Dr. F. V. Kharshiïng, DHS MCH & FW bad ba dei ruh u Joint MD, NHM ka jylla, Dr. J. Kharwanlang, State Tuberculosis Officer bad u Dr. B. Shanpru, District TB Officer, East Khasi Hills, ki nongtrei ka R.P. Chest Hospital nalor kiwei-kiwei ki nongshah khot sngewbha.
Haba ai jingkren ha katei ka sngi, u Ram Kumar S, IAS, Mission Director ka NHM ka jylla, u la ong ba ka sorkar pdeng bad ka sorkar jylla ki don ïa ka jingïohi jngai ban pynkut noh ïa ka jingpang TB ha ka dur kaba ïar hapoh ka Ri bad ka jingdonkam ban phah ‘test’ man la ka por ha ka por ba ki sngew artatien khnang ba ka jingai jingsumar kan long ha ka por kaba biang bad kumno yn lah ban ai jingsumar ïa kitei ki briew.
U la ong ruh ba kum ka jingpang TB ka long kaba donkam ban shim khia namar ka dei ka jingpang kaba lah ban pynkoit da ka jingsumar kaba biang.
Shuh shuh u la ban jur ïa ka jingdonkam ban leh screening ïa ka jingpang TB ha ki shnong nongkyndong da ka jingïatreilang bad ka shnong, ki nongsumar dawai kynbat, ki nongai dawai, ki nongsumar ban pyntikna ba ïa ka TB yn rat dyngkhong napoh ka jylla bad ka ri hi baroh kawei.
Na ka liang ka Dr. J. Kharwanlang, State Tuberculosis Officer ka la pyntip ba ka jylla ka don 4974 ki case ha u snem 2022 bad 4812 ki case ha u snem 2023.
Ha katei ka prokram, la plie ruh ïa ka C&DST Lab ka ban ai jingshakri bad jingsumar ïa kiba pang TB. Kum shibynta ka National Tuberculosis Elimination Programme (NTEP), la buh ruh ïa ki jaka ‘laboratories’ ha kylleng ka jylla.
