Khliehriat, Lber 20
U National General Secretary jong ka NPP, Bah Sniawbhalang Dhar, uba long ruh u Symbud Myntri Rangbah ka jylla, u la kynthoh ba u nongïalam ka seng VPP, u Bah Ardent M Basaïawmoit, um dei uba bamsap hynrei u don pat ka sap bam namar ka VPP ka lum `. 150 kum ka bai phom ban rung dkhot ha kane ka seng.
U Bah Sniawbhalang u la kynthoh kumtei haba kren ha ka jingïalang paidbah jong ka NPP kaba la long ha madan Kdohmuid, Jalaphet ha ka Sngi Balang ban pan jingkyrshan na ka bynta ka kyrtong ka seng ha ka ilekshon MP Lok Sabha, ka Kong Ampareen Lyngdoh.
Nalorkata, u Bah Sniawbhalang u la put turoi ba u kham tip bha ma u ïa ka khia ka … shon ka jingduna ha Nongkrem konstitwensi ban ïa u MLA jong ka namar ba u don ïing hapoh katei konstitwensi.
U la ong shuh shuh ba u MLA jong ka Nongkrem u lap- miet lap-sngi ban leit lorni sha konstitwensi kiwei bad ïalade pat um tip eiei shuh shaphang ki jingduna hapoh ka konstitwensi lajong.
Ki VPP ki kam ïalade kum ki ‘riew ieit ri, ‘riew ieid jaitbynriew, hynrei ka jingieid jaitbynriew khlem ka kam ka long kum ka jingshun, u la ong.
Shuh shuh une u nongïalam ka seng NPP u la ther ruh ïa u nongïalam ka VPP halor ka jingkynnoh bamsap ïa ka sorkar MDA.
“Lada u kynnoh ba ngi, ngi bamsap balei pat ki paidbah kim pynrem ïa ngi, bad u la ong ïa ki paidbah ban kylli ïa u Bah Ardent la katno sien u ïakhun bad la katno sien u shah rem,” la bynrap utei u heh ka NPP.
Nalorkata, u la ong ha ka jingwan hiar u nongïalam ka VPP shapoh Nartiang konstitwensi, u la pynshlur ïa ki paidbah ban bam pisa bad u la kyntu ruh ïa ki paidbah ban jied ïa ka VPP namar kam dei kaba bamsap. Tangba u la ong ba ka VPP thik-thik ka pynap da ka borti khrong pisa.
