Shillong, Lber 20
Ka sngi sdang jong ka jingthep kyrteng kiba dei ban ïakhun ïa ka ilekshon sha Ïingdorbar Lok Sabha na Shillong bad Tura Lok Sabha konstitwensi ka dang kynjah namar ym pat don mano-mano ba leit thep kyrteng.
Ka jingthep kyrteng ka la sdang ha ka Sngi Balang (20 tarik Lber) kaba dei ruh ka sngi ba pynmih ïa ka jingpynbna ban thep kyrteng.
Kiba thep kyrteng ban ïakhun na Shillong Lok Sabha konstitwensi ki hap leit ha u Returning Officer uba dei ruh u Deputy Commissioner ka East Khasi Hills district, katba kiba ïakhun na Tura Lok Sabha konstitwensi ki hap thep kyrteng ha u Returning Officer uba dei ruh u Deputy Commissioner ka West Garo Hills district.
Ha kawei pat ka liang, u President ka National People’s Party (NPP) ha Meghalaya, u Bah Prestone Tynsong u la ïathuh ba ka kyrtong jong ka NPP na Shillong, ka Kong Ampareen Lyngdoh kan sa leit thep kyrteng kum ka kyrtong jong ka seng ha 22 tarik mynta u Lber.
