Shillong, Lber 20 (UNI)
U National Vice-President ka BJP, u Dr. M. Chuba Ao ha ka Sngi Balang u la ong ba ka BJP ka la rai ban pynïeng kyrtong ha baroh 2 tylli ki Parliamentary konstitwensi sha ka Lok Sabha ha Meghalaya.
“Nga la ïakren bad u National President ka seng, u J.P. Nadda lyngba ka ‘phone’ halor ka Meghalaya. U (Nadda) la ïathuh ba ka seng kan pynïeng kyrtong na Shillong bad Tura Parliamentary konstitwensi,” la ong u Ao.
“Kiba bun ki la pan tiket na ka seng na bynta ka Shillong bad Tura Parliamentary konstitwensi. Nga tikna ba ka seng kan sa pynskhem ïa ki kyrteng jong ki kyrtong ha kine ki khyndiat sngi ban wan,” u la ong.
Ki don ki jingïakren shane-shatai ba ka BJP ka lah ban ym pynïeng kyrtong ha kane ka ilekshon ban wan sha ka Lok Sabha ha Meghalaya hadien ba u Myntri Rangbah bad National President ka National People’s Party (NPP), u Conrad K. Sangma, u la rai ba ka seng jong u kan ym pynïeng kyrtong ha ki 2 tylli ki Parliamentary kongstitwensi ha Arunachal Pradesh bad kan kyrshan ïa ki kyrtong ka BJP.
Hynrei u National Vice-President ka BJP u la kren shai ba ka seng kan ym don jingïasam konstitwensi eiei bad ka NPP ha Meghalaya.
“Ngin ym don kano-kano ka jingïasam konstitwensi bad ka NPP ha Meghalaya ne ha kiwei-kiwei ki Jylla ka Thaiñ Shatei Lam Mihngi. Ka NPP ka kyrshan ïa ngi ha Arunachal Pradesh namar kim don kyrtong ba biang ban ïakhun ha kane ka ilekshon sha ka Lok Sabha,” la ong u Ao.
Ka seng ka la pynïeng ïa u Myntri Sorkar Pdeng, u Kiren Rijiju na Arunachal West bad u Tapir Gao kum u kyrtong ka BJP na Arunachal East.
Ka NPP ka la rai ban pynïeng da ka Myntri Sorkar Jylla, Dr. Mazel Ampareen Lyngdoh na Shillong, katba ka MP ka Lok Sabha, ka Agatha K. Sangma kan long biang ka kyrtong ka seng na Tura.
Ki don 6 tylli ki kyrteng kiba la phah na bynta ka Tura Parliamentary konstitwensi bad 5 tylli na bynta ka Shillong Parliamentary konstitwensi ba kynthup ïa ka kyrteng u Myntri ka Sorkar Jylla, Bah A.L. Hek.
Ki kyrteng jong kine 6 ngut kiba pan tiket na Tura Parliamentary konstitwensi ki kynthup ïa u MDC ka seng, u Bernard N. Marak, MLA barim, u Winnerson D. Sangma, Boston Marak, Riya Sangma, K.C. Boro bad Thomas Marak.
Haba phai pat sha Shillong Parliamentary konstitwensi, nalor ka kyrteng u Bah Hek, ki 4 ngut kiwei pat kiba la pan tiket ki kynthup ïa u President barim ka seng, Bah Ernest Mawrie, President ka BJYM, u Mewaker Lyngdoh, Dr. Fenela Lyngdoh Nonglait bad Sumitra Laloo.
