Nongpoh, Lber 21
Ka jingthmu ban pynlong ïa ka jinglehniam Shad Sajer ba shisien shisnem jong ka Elaka Nongpoh kan nym urlong shuh hadien ba ka komiti ba dei khmih ïa kane ka jinglehniam ka la shim ïa ka rai ban pynsangeh noh hadien ba ka Khasi Hills Autonomous District Council (KHADC) ka la rai ban thung biang ïa u Bah Wanphrang Syiem Nongshai kum u Sirdar ka Elaka Nongpoh.
Ïa kane la pyntip paidbah da ki nongïalam ka Shad Sajer Committee jong ka Elaka Nongpoh ba kynthup ïa ka Raid Nongkharai, Raid Nongpoh, Raid Nongkhrah, Raid Nongkyrla, Raid Nonglyngdoh bad ka Raid Sohkhwai haba kren sha ki lad pathai khubor ha ka janmiet Sngi Palei ha ïing dorbar jong ka shnong Pahamsyiem.
Kum ban shu kdew hangne, ka KHADC ha kine ki khyndiat taïew ba la dep, ka la pynmih ïa ka hukum ba la weng noh ïa u Bah Pillarstone Syiem kum u Acting Sirdar ka Elaka Nongpoh bad pynmih pat ïa ka hukum ba la thung biang ïa u Bah Wanphrang Syiem Nongshai kum u Sirdar ba pura jong ka Elaka Nongpoh.
Haba kren sha ki lad pathai khubor, u Bah Luistar Lyngdoh, Chairman jong ka Shad Sajer Committee u la ïathuh ba ka komiti ha ryngkat bad kitei hynriew tylli ki Raid ki la hap ban pynsangeh noh ïa ka lehniam Shad Sajer kaba la rai ban pynlong ha ka 23 tarik mynta u bnai ha u Lum Wyrtoh ha Nongpoh kaba la dep ban pynkhreh-pynkhrum bad khot sngewbha ruh ïa ki kongsan bad ki ‘riew paidbah jong ka bri hynñiewtrep ban wan sakhi ïa ka jingriewspah ka riti kolshor bad ka rukom im jong ki khun ki hajar ka Elaka Nongpoh.
U Bah Luistar Lyngdoh u la ïathuh ruh ba ka daw ba kongsan kaba pynlong ïa ka komiti ban pynsangeh noh ïa ka lehniam Shad Sajer ka dei halor ka jingpyrshah ïa ka hukum kaba la pynmih da ka KHADC ban thung biang ïa u Bah Wanphrang Syiem Nongshai kum u Sirdar ba pura jong ka Elaka Nongpoh.
Halor kane ka jingpynsangeh ïa ka lehniam Shad Sajer, u Bah Luistar u la pynpaw ruh ïa ka jingpanmap na ki khun ki hajar jong ki Raid bapher-bapher ka Elaka Nongpoh, ki nongshah khot sngewbha bad ïa baroh ki paidbah ka bri u hynñiewtrep ba ka komiti kam banse ban pynsangeh noh ïa kane ka jinglehniam mynta u snem na kitei ki daw ba la kdew haneng.
