Shillong, Lber 21
U General Secretary cum Publicity Secretary ka Hynñiewtrep National Liberation Council, u Bah Saiñkupar Nongtraw, ha u kyrwoh khubor ba la pynmih paidbah lyngba ka rynsan ‘Facebook’ u la ong ba katkum ka jingtohkit jong u nongbishar ba la shongthait u Justice (Retd) T. Vaiphei halor ka jingshah siat ïap u Bah Cherishstarfield Thangkhiew ha ki pulit ka jylla la lap ba ki pulit ki kam ba u Bah Che u dei u Sanbor Pala. U Bah Nongtraw u la buh jingkylli ruh da kaba ong ba kumno ki pulit ki pyllait pat ïa ka jingïakren hapdeng u Sanbor Pala bad uwei na ki dkhot jong ka seng ba la shah kem dang ha kine ki khyndiat sngi ba la dep, bad u la ong ba ka jingleh jong ki pulit ka jylla ban shim ïa ka jingim jong u Bah Che ka long tang ban shu pharep bad tap eit miaw ïa ki kam riewkhlaw jong ki.
Kane ka jingpyntip na u Bah Saiñkupar ka la wan hadien ba ki pulit ka Ri Bhoi ha ka Sngi Palei ki la pyllait ïa kaei kaba ki la kam ba ka dei ka jingïakren hapdeng uwei samla uba la shah kem dang shen na Ri Bhoi bad uwei heh ka HNLC uba ki pulit ki la kynnoh ba u dei uta u Military Commander jong kane ka seng. Ki pulit ki la ong ruh ba uta u Military Commander u dei ba la tip kyrteng kum u Sanbor Pala.
Kine ki kot ki sla kiba la pyni hangne ki dei kiba la sot na ka kaiphod u Justice T Vaiphei halor ka jingshah siat ïap u Bah Cherishstarfield Thangkhiew ba la pyllait paidbah ha u Nailur 2022 ha kaba ka kyrteng u Sanbor Pala ka la paw ha kiba bun ki bynta.
Katkum kane ka kaiphod la thoh shai ba na ka jingpyntip ki pulit, uta u Sanbor Pala u dei u Bah Cherishstarfield Thangkhiew. La ong ruh ba u Bah Cherishstarfield hadien ba u khlem don bynta shuh kum u General Secretary ka HNLC u la pyndonkam da ka kyrteng Sanbor Pala.
