Shillong, Lber 21
U MP ka Shillong uba dei ruh u President ka Congress ha Meghalaya, u Bah Vincent H Pala, u la ong ba ka jingbym ïatreilang ka Congress bad ka TMC ha kane ka ilekshon MP kam dei ka daw jong u bad jong u Dr Mukul Sangma, hynrei ka dei kaba la leh hadien ka jingïakren bad ki heh ka TMC sha Delhi.
Ha kajuh ka por u Bah Pala uba long ruh u kyrtong ka Congress ha kane ka ilekshon MP na Shillong, u la ong ba lada ka Congress ka phah ïa ki briew jong ka ban kyrshan ïa ka TMC ha Garo Hills bad lada jia ba ki briew ka TMC ki leit pynïasoh bad ka BJP, ka la long pynban kumba ka Congress ka phah ïa ki briew ban leit pynïasoh bad ka BJP.
U la ong ba katkum ki khubor ba la ïohlum, la ong ba ka TMC ka don ka jingïakren sngewthuh jingmut bad ka BJP.
Shuh shuh u Bah Pala u la ong ba jingïapher bad jingïapra hapoh ka Congress ha ka jylla kam dei na ka daw ka jingïapher jingmut hapdeng ma u bad u Dr. Mukul Sangma, hynrei ka dei ka jingdon ar jingmut jong ki nongïalam ka TMC ban pynïasoh bad ka BJP, bad kane ka la pynlong ïa ki katto-katne ki dkhot barim ka Congress ban mih na ka seng.
Haba kren shaphang ka jingpynshit ka VPP ha ki rynsan ïalap ilekshon, u Bah Pala u la ong ba hadien ba la ïohsngew ïa ka sur jong u paidbah na ki bynta bapher bapher, ki pynpaw ba ki mat kiba ka VPP ka wanrah ka lah ban ym wanrah ka shongsuk shongsaiñ hapoh ka jylla bad ka Meghalaya ka lah ban ngat ha kajuh ka apot kaba ka Manipur ka la mad bad kiwei kiwei ki jylla kiba don ka jingsngew ïapher jingmut halor ka jingdon ki jaitbynriew.
U Bah Pala u la ong ruh ba ka jingmih jong ka VPP ban ïakhun ïa ka ilekshon MP ym pat lah ban ong ïa ka vote jongno kan shim ne pynpra, hynrei yn sa sngewthuh ynda la ïaid sha ki shnong ha ki thaiñ nongkyndong bad ha sor.
Une u nongïalam ka Congress u la ong ba hap ban sngap bad bishar ïa ki mat kiba kiwei ki seng saiñ pyrthei ki shim, bad kum ka seng kan sa lah ban ïaid shakhmat ha kaba ïadei bad ki kam jong ka ha kane ka ilekshon.
Shuh shuh u Bah Pala u la ong ba kiwei ki seng ki lah ban kren katba mon hynrei ka jingthmu jong ka Congress ka long ban pynsngewthuh ïa ki paidbah halor ki nongrim jong ka seng lyngba ki rynsan ïalap ilekshon ha kine ki sngi ban sa wan.
U Bah Pala u la bynrap ba ka Congress ka la hikai ïa ki briew jong ka kumno ban kren ha ki rynsan ïalap ilekshon khnang ba kan long ka jingpynsngewthuh kaba janai bad ba ym dei ban kren kulmar wat la kiwei ki seng ki lah ban kren katba mon.
U la ong ba ka Congress ka hap ban pyrkhat sani bha ha shwa ban pynsngew ïa ki mat sha u paidbah.
