Shillong, Lber 21
Wat hapdeng ka jinghap slap bad khriat ka suiñ bneng hapoh nongbah Shillong ha ka Sngi Balang ka 20 tarik u Lber 2024, hynrei kane ka shym khanglad satia ïa ki paidbah ban leit sngap ïa ki sur jingrwai jong u nongrwai ba pawnam ka pyrthei, u Calum Scott uba la pynshongshit ïa ki paidbah ha katei ka sngi.
U Calum Scott u la wan ban rwai hapoh ka hall jong ka Lariti International Centre for Performing Arts kaba don ha Mawkasiang Shillong hapdeng ka jingsakhi jong shihajar tam ki nongwan peitkai. Ha kane ka sngi la sakhi ruh ba ki paidbah ki la ïeng na ki jaka shong bad rwai ryngkat bad utei u nongrwai uba la rwai kumba 10 tylli eiei ki jingrwai.
La pynlong ïa kane ka put ka tem da ka Rockski EMG ha ryngkat ka jingïatreilang bad ka Meghalaya Tourism.
Utei u nongrwai u la pynkut ïa katei ka sngi da artylli ki jingrwai bapawnam jong u kiba la tip kum ka “You Are The Reason” bad ka “Dancing On My Own” hapdeng ka jingjaw ummat namar ka jingsngewieid jong u ïa ki paidbah kiba la rwai lang ryngkat bad u.
“Kane ka dei ka jingphohsniew kaba la wan urlong shisha. Kane ka long kumba nga rwai na ka bynta ki briew kiba ieid ïanga bad kiba wan hangne tang ban ïohi ïanga. Ngan ïai kynmaw ïa kane shijunom”, la ong u Calum Scott hapdeng ka jingjaw ummat.
Haba kren sha ki lad pathai khubor shwa ba un ïeng ha rynsan ban rwai bad haba kylli na kaei ka daw ba la pynlong ïa u ba un jied ïa ka nongbah Shillong ban wan rwai, u Scott u la ong ba ki paralok jong u kiba kynthup ïa u Armaan Malik bad u Ronan Keating ki la ïathuh ïa u ba ka tem ka put bad ka rwai ka siaw hapoh nongbah Shillong ka long kaei-kaei kaba sngewtynnad palat bad kane ka jaka ka dei kaba biang tam ïa u ruh ba un wan ban rwai na ka bynta ki paidbah kiba ieid ïa ki sur jingrwai.
Lah ban pynkynmaw hangne, u Ronan Keating bad u Neyo kiba dei ki nongrwai bapawnam ka pyrthei ki lah wan ban pynshongshit ïa ki paidbah ka jylla hapoh ka tamasa Cherry Blossom kaba la pynlong ha Ri Bhoi ha u 2023. Kine ar ngut nongrwai ki la ïaroh shikatdei eh ïa ki paidbah ka jylla kiba la wan ban tuid sha katei ka tamasa ban sakhi ïa ki.
Ha katei ka sngi ka la don ruh ka jingpynbna ïa ki nongjop ïa ka Mega Music Festival kiba long u Dappest bad u ADL. Kine ar ngut kin sa pynkhreh ïalade ban leit rwai lang bad u Sean Kingston bad u Akon bad ki la ïohpdiang ruh ïa ka song pisa `25 lak.
