New Delhi, Lber 21
Ka kynhun ba 12 ngut na ka Enforcement Directorate jong ka Sorkar Pdeng ka la kem noh ïa u Myntri Rangbah ka Delhi, u Arvind Kejriwal, ha ka miet Sngi Palei halor ka jingkynnoh ba u la ïadon bynta ban ïasylla ha ka jingpynmih ka Sorkar Delhi ïa ka ‘Liquor Policy’ lane ka jingpyntreikam ïa ka rukom die kyiad ha nongbah Delhi.
Da kane ka jingshah kem, u Kejriwal, uba ïalam ruh ïa ka Aam Aadmi Party (AAP), u la long u Myntri Rangbah (uba dang don ha ka shuki) banyngkong tam ha ka Ri India u ban shah kem.
Ïa u Kejriwal la kem na ka ïing sah jong u ha Delhi bad ka ED ka la ïalam ïa u sha ka shlem treikam jong ka khnang ban pynlong ïa ka jingtohkit pyrshah ïa u.
Ka jingshah kem jong u Kejriwal ka long hadien ba ka Delhi High Court ka la kyntait ban ai jingïada ïa u na ka jingshah kem ha kaba ïadei bad ki kynrum-kynram jong ka ‘Liquor Policy’. Lah ban kdew ba ka ED ka la khot la khyndai sien ïa u Kejriwal ba un wan mih ban jubab ïa ki jingkylli, hynrei ha baroh khyndai sien u la kyntait.
Na ka liang ka ED ka la ong ba u Kejriwal u dei u “nongïasylla” ha kaba ïadei bad katei ka kynrum-kynram. Ka jingkynnoh ka long ba ka nongïalam ka seng Bharat Rashtra Samithi (BRS), K Kavitha, ka la ïasylla bad u Kejriwal, bad kiwei pat ki nongïalam ka AAP, u Manish Sisodia bad u Sanjay Singh, ha ka por ba la pynwan dur ïa ka “Liquor Policy” kaba la dep pyndam noh hadien.
La kynnoh ba jingïasylla ka long ban shna ïa katei ka “Liquor Policy” khnang ban ïarap ïa kawei ka kynhun ki nongdie kyiad na ka thaiñ Shathie jong ka Ri India. Ka ED ka la ong ba kane ka kynhun ka dei kata ka ‘South Lobby’. Kum ka jingsiew kylliang, ka ED ka la ong ba kata ka ‘South Lobby’ kan ai `100 klur ïa ka AAP.
Shuh shuh ka ED ka la ong ba ka kyrteng jong u Kejriwal ka la mih ha ki jingthoh ba la ai da katto-katne kiba shah kynnoh bad ki sakhi.
Na ka liang u Kejriwal u la ai da ka mukotduma ha Supreme Court halor kane ka jingshah kem.
