Mawkyrwat, Lber:
Kum shi bynta ban pynthikna ïa ka shongsuk-shongsaiñ bad ïaid beit ïaid ryntih jong ka ilekshon Lok Sabha 2024 hapoh ka district, u District Magistrate bad District Election Officer ka South West Khasi Hills District u la pynmih ïa ka hukum hapoh Section 144 CrPC ha kaba la khang ban pynlong jingïalang bad ïalum briew palat ïa ka 5 ngut khlem ka jingïoh jingbit na ki bor district bad la mana ruh na kaba rah ïa ki tiar siat ne tiar pynmynsaw.
Ha kawei pat ka hukum ba la pynmih, u District Magistrate u la khang ban thoh ne dro ha ki kynroh, ban tah lane wah ïa ki poster, ki kot lane kino-kino ki jingthoh ne jingpynïeng ïa ki banner, ki hoarding bad kumta ter ter ha ki shlem treikam sorkar ne jaka sorkar bad ruh kino-kino ki jingthoh ha kano-kano ka rukom ha ki kynroh ne jaka jong ki ‘riewshimet khlem da ïoh ïa ka jingbit (NOC) da ka jingthoh na ki trai jaka bad shlem treikam jong u District Election Officer.
Ym shah ban pyndonkam ïa ka kor pynsawa (PA System) naduh 10 baje mynmiet haduh 6 baje mynstep. Yn ym shah ban pynlong jingïalang ïalap ilekshon khlem da pan bad ïoh jingbit na ka shlem treikam u District Magistrate kumjuh ruh ka jingbit na ka shnong ha kaba ïadei bad ka jaka ban pynlong ïa ka jingïalang.
Kiba pyndonkam ïa ka PA System bad Loudspeaker khlem ïoh jingbit na u District Magistrate kin shah pynshitom katkum ki kyndon aiñ. Ym shah ban pynlong rally ne ïaid paidbah khlem ka jingai jingbit na u District Magistrate.
Ïa kine ki hukum la pyntreikam shisyndon tad haduh ban da kut ka ilekshon.
