Shillong, Lber:
U General Secretary ka Khasi Students’ Union (KSU) Sengkmie, Samla Donald Thabah, u la pynpaw ba aïu kan jia ïa ka jaidbynriew Khasi kaba don tang 15 lak ngut lada wan kiew ki Hindu na Bangladesh haba la pyntreikam ïa ka Citizenship Amendment Act.
U la ong ba ka Sorkar India ka dei ban pyndam beit ïa kane ka aiñ namar ka ktah ïa ki jaidbynriew rit paid.
U la ong ba ki Hindu ha Bangladesh ki don kumba 1 klur 65 lak ngut tam bad lada ki kiew tang 25 lak ngut ym tip shuh aïu kan jia ïa ka jaidbynriew rit paid.
Shuh shuh u la pyntip ba ka ïingbishar ba hakhliehduh jong ri India kan sa shong bishar ha ka 9 tarik u Ïaïong halor ka mukotduma kaba la ujor da ka North East Students’ Organisation bad ha shwa kata ka ïingbishar ka la bthah ïa ka Sorkar India ba kan ai jubab ïa baroh 327 tylli kiba la ai mukotduma haba ïadei bad ka CAA.
Haba ïakren halor ka jingdap 46 snem ka KSU ha ka jingïaid lynti, u samla Donald u la ong naduh 2001 haduh 2013 ki samla ki la ïakhih ki la shah kem hynrei kam don ka jingshimkhia ki bor synshar.
U la ong lada peit kiwei ki jaidbynriew kum ki Bodo haba ki ïakhun ban pynrung ïa ka ktien jong ki, ki mih baroh bad wat ki MP ki ïakhihlang, nangta ki MLA ha Mizoram naduh ki liang synshar bad liang pyrshah ki leit lut sha khappud haba ka don ka jingktah ïa ka jaidbynriew, katba ha Meghalaya ki nongmihkhmat ki shu kren ïa ki mat jong ka jaidbynriew tang ha ka por ilekshon.
