Shillong, Lber 21
U MLA barim ka Baghmara u Samuel M Sangma uba la pynïasoh sha ka Bharatiya Janata Party (BJP) ha shwa ka ilekshon MLA ha u snem 2023, ha ka Sngi Palei u la leit ban pynïasoh noh ïalade bad ka National People’s Party (NPP).
Kane ka jingleit pynïasoh une u MLA barim sha ka NPP, kan ktah ïa ka BJP ha ri-lum Garo khamtam lei ba ki sngi bad taïew sha ka ilekshon MP ki la nangjan.
Lah ban pynkynmaw ba u Samuel M Sangma u dei MLA uba la jop na Baghmara haduh 10 snem kynthih haba u la ïakhun kum u kyrtong shimet. U la leit ban pynïasoh noh sha ka BJP tang katto-katne taïew shwa ka ilekshon MLA ha u 2023 bad shwa kane, u la dei ruh u ‘associate member’ jong ka UDP.
Ka BJP ka la pynïeng ïa u Samuel na Baghmara konstitwensi da ka jingkyrmen ban jop, hynrei u la shah rem noh ha u kyrtong shimet u Kartush Marak.
Kane ka jingleit pynïasoh u Samuel sha ka NPP, kan long shisha kaba kongsan ha kane ka ilekshon MP na ka bynta ka Tura Lok Sabha, namar kumba ka long mynta, ka BJP kam don nongïalam ha ki bynta ba shathie jong ka ri-lum Garo.
Ïa u Samuel Sangma lem bad ki nongkyrshan la pdiang sngewbha sha ka NPP da ki nongïalam ba kynthup ïa u Marcuise Marak bad Rakkam A Sangma kiba dei ruh ki Myntri Sorkar nalor kiwei-kiwei ha ka jingïalang hapoh shlem treikam ka NPP ha Baghmara.
