Shillong, Lber 21
Ka tnat pule Social Work jong ka St. Edmund’s College ka la pynlong ïa ka prokram pynsngewthuh paidbah halor ka jingma bad ka jingkyrni haba pyndonkam ïa ki jingdih pynbuaid kum u drok bad kiwei-kiwei kaba la pynlong hapoh Lumdiengjri.
Ïa katei ka prokram la pynlong da ka St. Edmund’s College ha ryngkat ka jingïatreilang bad ka Manbha Foundation bad ka Seng Samla jong ka Lumdiengjri ba la noh synñiang da ka Directorate of Social Welfare hapoh ka Drug Reduction Elimination and Action Mission (DREAM).
Ki la don kumba 130 ngut ki briew kiba la wan ban ïashimbynta ha katei ka prokram pynsngewthuh paidbah kiba kynthup naduh ki khynnah pule na ki skul bad ki kolej bapher-bapher, ki dkhot bad ki nongkitkam shnong nalor kiwei-kiwei.
Shuh shuh ha katei ka sngi la don ryngkat lang ruh da ka Dr. Rica Lamar kaba dei ka Psychiatrist bad ka nongseng ïa ka Manbha Foundation kaba la ai jingkren halor ka jingsniew bad ka jingktah jong une u jait jingdih pynbuaid ïa ka met jong u briew, ka jingpait jingpra ki longïing- longsem namar une jingdih pynbuaid bad kumjuh ruh ïa ka imlang-sahlang baroh kawei.
Ka thong ba la pynlong ïa kane ka prokram ka long ban pynsngewthuh paidbah bad ban pynshlur ïa ka imlang-sahlang khamtam ïa ki khynnah samla ba kin wan ban ïatreilang ban pynduh jait ïa une u jingdih pynbuaid bad ban kyntiew bad ban wanrah ka bha ka miat hapoh ka imlang-sahlang.
