
Shillong, Lber 21
Uwei briew ba la 50 snem ka rta bad uba trei ha ka kam shna surok, ïa uba la tip kyrteng kum u Akhilesh Chauhan uba na ka jylla Uttar Pradesh, u la shah rahbor na ka jaka trei kaba don hajan ka shnong Rongdik ha South Garo Hills.
Katkum ka jingïathuh jong ki pulit, utei u nongtrei u la shah rahbor ha ka por kumba 1:40 mynstep jong ka Sngi Ba-Ar.
Katkum ka ejahar ba la ujor ha ki pulit ka Siju, la ong ba ki runar ki bym lah ban ithuh ki la wan sha ka jaka ba sah ki nongtrei ha katei ka step bad ki la pan umphniang diesel na kiba shong ba sah ha katei ka jaka.
Na ka liang u Manager uba don ha katei ka jaka u la bthah ïa u Chauhan ban ïakren bad kitei ki briew. Hynrei ynda u Chauhan u khlem wan phai na kata ka jingïakren bad kita ki briew, ki para nongtrei ki la sdang ban wad ïa u.
Ka kompani kaba u Chauhan u trei ka dei kaba don bynta ban shna surok bad jingkieng ha South Garo Hills.
Na ka liang ki pulit ki la sdang ban pynlong ïa ka jingthwet ban ïoh pyllait ïa utei uba la shah rahbor. Ki pulit ki la ong ba ki la lap ksai malu-mala hynrei ka dang kloi than ban ïathuh bniah. Hynrei ki la kyrmen ba kin sa lah ban ïoh pyllait kloi ïa utei nongtrei.