Nongpoh, Lber 21
Katba ka jingmaramot ïa ka jingkieng ba den ïa ka pung Umïam ka dang ïaid shaphrang, ki bor ba dei khmih jong ka Meghalaya Energy Power Generation Corporation Limited (MeEPGCL) ki la pyntip paidbah ba kan don ka jingkhang ïa ka jingïaid jong ki kali lyngba ka jingkieng Umïam ka ban sdang naduh ka 31 tarik u Lber haduh ka 8 tarik u Ïaïong.
Katkum ka jingtip ba la ïoh, la ong ba ha ka 31 tarik u Lber 2024, ka jingkhang ban ïaid kali kan long kumba 6 kynta, ka ban sdang naduh ka por 8 baje mynstep haduh 2 baje nohphai sngi. Ha kine kynta yn shah ïaid tang ïa ki kali kit nongpang (ambulance). Hadien ba la pyndep ïa ka jingmaramot ha kine ki kynta, yn plie ïa shiliang jong ka jingkieng ka ban shah pat ïa ki kali kiba khia hapoh 4 ton ban ïaid naduh ka janmiet jong ka 31 tarik u Lber 2024 tad haduh ka 7 baje mynstep jong ka 8 tarik u Ïaïong 2024.
Halor kane ka bynta, la bthah ruh ïa ki Deputy Commissioner jong ka Ri Bhoi District bad East Khasi Hills District ba kin pynbeit ïa ki jaka ban pynsangeh ïa ki kali shwa ban poi sha katei ka jingkieng ha kitei ki kynta bad tarik kiba la khang bad ban ailad pat tang ïa ki kali kit nongpang bad kiba hapoh ka 4 ton ba kin ïaid katkum ka jingpynbeit kaba la kdew haneng.
Shuh shuh la bthah ruh ïa ki bor ba dei khmih jong ka tnat PWD ba kin pynbeit da kiwei ki surok ïaid kali ha ka por khang kaba 6 kynta jong ka 31 tarik u Lber 2024 bad ruh ban pynïaid ïa ki kali kiba khia palat ïa ka 4 ton da kawei pat ka surok naduh ka 31 tarik u Lber ter ter haduh ka por 7 baje mynstep jong ka 8 tarik jong u Ïaïong 2024.
