Shillong, Lber:
Ka Kong Regina Jyrwa ka la ïathuh ba ka don khun shiphew ngut hynrei ka la hap ban sah lang ha ki lai kamra ha ka ïing kaba la ker da ka lyntang bad tap da ka tin. Hynrei mynta ka la pynpaw ka jingsngewkmen haba ka la ïoh ïa ka ïing saw kamra kaba la shna da ka Khasi Students’ Union (KSU) Mawlai Circle.
Haba ïakren kyrpang bad ka Kong Regina ka la ïathuh ba ha kane ka ïing lyntang la kumba 34 snem ha ka jingsiew kaba `250 shibnai namar ka shu sah wai hynrei hadien ba ka Kong Streamlet Kharbhih kam shym la shim shuh ka bai wai bad ai sngewbha ïa ka jaka kaba ym duna ïa ka 2000 square feet.
Ka la ïathuh ba man ka sngi ka shu leit bylla ïing briew ban ap khyllung bad u lok jong ka ruh u Bah Kwor Syiemïong u shu bylla ban pyndap bam ïa ki khun kiba don 7 ngut ki shynrang bad 3 ngut ki kynthei.
Ka Kong Regina Jyrwa ka la jaw ki ummat haba ka la shimti ïa ka ïing kaba la shna da ka KSU Mawlai Circle haduh saw kamra kaba la long ha ka 20 tarik Lber 2024 ha Mawlai Nongkwar Block-10.
Kum ka dak ban rakhe ïa ka jingïaid lynti jong ka Khasi Students’ Union Sengkmie kaba la kynjoh sha ka 46 snem, ka KSU Mawlai Circle ka la ïoh ban aiti mynta ka sngi ïa kane ka ïing kaba la shna da kaba wan khap ribbon da u General Secretary ka KSU Sengkmie u samla Donald Thabah ha ka jingïadonlang u President ka KSU Mawlai Circle u samla Biangbor Paliar, u Rangbah Shnong Mawlai Nongkwar Bah Moonstar Rumnong, Secretary Shnong Bah Esekiel S Mond, Kong Streamlet Kharbhih kaba dei ka trai jaka kaba la ai sngewbha, ki bahaïing hasem ka Kong Regina Jyrwa, ki dkhot ka KSU bad ki nongïalam ka FKJGP Mawlai Circle.
Ïa kane ka ïing ka KSU ka la shna mynshem snem ha ka jinglut ka bym duna ïa ka `7 lak lyngba ka jingkyrshan lang ki dkhot ka seng bad ki dkhot ka jaidbynriew.
Haba ai jingkren ha kane ka jingïalang u samla Donald Thabah u la ong ka Mawlai Circle ka la pyni ïa ka nuksa kaba bha ban shna ïing ïa ki longïing ki baduk.
U la ong ba ka jinghiar ka ïoh ka kot hapoh ka jylla ka dei namar ka jingbym lah ki nongmihkhmat ban tei ïa ka jaidbynriew.
U la ong haba la jan ka ilekshon ha jaka ba kin kren ïa ki mat kaba ktah ïa ka jaidbynriew ki pynbun ka jingïakren kamkai. Kumta u la kyntu lada ki kwah ban kren kai ki dei ban pynkhie im biang ïa ka Seng Biria U Khasi (SBUK) ban ïakren tamasa katba mon, hynrei lada ki kren ïa ka saiñpyrthei ki dei ban kren ïa ka jingmyntoi jong ka jaidbynriew namar dei lyngba jong phi ki nongmihkhmat ka jylla ka kiew.
Na ka liang u samla Biangbor Paliar u la pynkynmaw ba katkum ka jingïathuhkhana hashwa ban pynkha ïa ka seng KSU, kane ka thaiñ dei kiba sah ki Nepali kiba ri masi hynrei naduh ba la pynkha ïa ka KSU ha u snem 1979 mynta la shong la sah tang para Khasi.
