“Nga tieng ïoh ngat ki Khasi” || “U Sanbor u dei u Military Commander ka HNLC”

Shillong, Lber 21

Ki pulit ka Ri Bhoi ha ka Sngi Palei ki la pyllait paidbah ïa kaei kaba ki kam ba ka dei ka jingïakren lyngba ka ‘phone’ hapdeng uwei briew uba la kam ba u dei u Military Commander ka seng Hynñiewtrep National Libe -ration Council (HNLC) ba la tip kyrteng kum u Sanbor Pala bad uwei samla na Ri Bhoi uba la shah kem halor ka jingkynnoh ba u la don jingthmu ban pynbthei bom IED. Lah ban kdew ba saw ngut ki la shah kem na Ri Bhoi, bad uwei napdeng kine la lap ïa ki tiar pynbthei bom IED bad la kynnoh ba ki la thmu ban pynbthei bom ha Shillong bad Nongpoh.

Ka jingshah kem jong kitei saw ngut ka long hadien ka jingbthei bom IED ha Them Metor ha ka miet   jong ka 9 tarik Lber. Ka HNLC kham hadien katto-katne sngi ka la shim jingkitkhlieh halor kane ka jingjia bad ka la pynbna ba dei ka Budnar Shadow Squad kaba la don bynta. Kane ka Budnar Shadow Squad ka dei kum ka kynja Special Force jong ka HNLC.

Mynta ka sngi pat ki pulit ka Ri Bhoi ki la pyllait paidbah ïa katei ka jingïakren hapdeng uta u Military Commander ka HNLC bad uwei na ki saw ngut kiba la shah kem na Ri Bhoi.

Ha kane ka jingïakren la sngewthuh ba ka dei halor ka kam pynbthei bom. Na ka liang uwei na ki saw ngut ki samla na Ri Bhoi u la ong ha uta u heh ka HNLC ba um nud shuh ban leh ïa ka kam bad u tieng ïoh kiba shah ktah kin dei lang ki Khasi. Uta u heh ka HNLC ruh u la phah pynsangeh shwa namar ba dang kham khluit ka jinglong-jingman. Kane ka jingïakren ka la neh palat hynriew minit bad ka la don ka jingring dur katba utei u samla u dang ïakren bad uta u heh ka HNLC.

Ki pulit ki la ong ba kane ka jingïakren ka dei hadien ba la kem ïa utei samla na Ri Bhoi bad hadien ba la lap ïa u bom IED.