Jowai, Lber 21
Ka District Commerce and Industries Centre Jowai, ha ka 20 tarik u Lber, kal a pynkup burom ïa 25 ngut kiba la pyndep ïa ka jingshah hikai ban shna ïa ki jingshna bapher bapher kum ki sohskhor, kpieng bad ki tiar pynriam ïing da kaba pyndonkam da ki siej.
Kane ka jingai jinghikai kaba 25 sngi ha ka shnong Sohkha Mission la wan ban ai jinghikai da Master Craftsmen jong ka Neera Foundation.
Ïa kine 25 ngut kiba la pyndep ïa ka jingshah hikai la pynkup burom da u kongsan Bah ML Wanshnong Joint Director, Directorate of Commerce and Industries, ha ryngkat ka jingdon u Bah S Majaw Retired General Manager, ka Neera Sarmah, Director, Neera Foundation, Kong SE Kharpran, Functional Manager DCIC Jowai, Bah S Pale, Industrial Promotion Officer DCIC Jowai, Bah P Suchen Waheh Shnong, Bah M Manner, Secretary Shnong bad kiwei. U kongsan ha ka jingkren u la ïaroh ïa ki nongïashim bynta kiba la pyndonkam ïa la ka sap lyngba ka jingshah hikai. U la kyntu ruh ban pyndonkam hok ïa ki jinghikai ba ki la ïoh bad ban pynjanai shuh shuh ïa ka kam bad ki jingshna ki jong ki.
Ha kane ka jingïalang la ïoh ruh ïa ki jingkren na u P Suchen, ka Neera Sarmah bad Kong SE Kharpran bad kumjuh na ar ngut ki nongshah hikai kiba la pynsngew ïa ka jingmyntoi ba ki ïoh ha kine 25 sngi jong ka jingshah hikai.
