Shillong, Lber 21
Ka Election Commission of India (ECI) ka la ai jingmynjur ïa ka tnat Rural Development ban ïaid shakhmat ban pynbna ba ka la pynkiew thymmai ïa ka bai bylla hapoh ka skhim 100 sngi lane ka Mahatma Gandhi National Rural Employment Guarantee Act (MGNREGA). Kane kan treikam naduh u snem mang tyngka ban wan, kata naduh ka 1 tarik u Ïaïong, 2024.
Kane ka jingpynkiew ïa ka bai bylla la leh katkum ki jingpynkylla hapoh ka CPI-AL (Consumer Price Index-Agriculture Labourer).
Ha u bnai ba la dep, ka Parliamentary Standing Committee ka la phah ïa ka jingai jingmut sha ka Sorkar Pdeng ban pdiang ïa ki jingpynpaw haba ïadei bad kaei kaba ïahap bad biang eh ban pynkiew ïa ka bai bylla hapoh ka skhim MGNREGA.
Hapoh kane ka skhim MGNREGA, ki dkhot jong ka longïing kiba la rangbah ki ïoh bhah la kumno-kumno 100 sngi ban trei bylla shisnem. Ki don ruh ki khep ba ka Sorkar ka shah ban trei tam sa 50 sngi khamtam ïa ki 100 sngi ba la buh.
Ha une snem mang tyngka 2023-2024 u ban sa kut noh ha ka 31 tarik Lber 2024, ki don kumba 6 klur tylli ki longïing ha nongkyndong kiba la ïoh myntoi na kane ka skhim MGNREGA tad haduh ka 20 tarik mynta u Lber. Na kine, la ong ba ki don 35.5 lak tylli ki longïing kiba la pyndep ban trei bylla 100 sngi.
