Shillong, Lber 21
Ki pulit ka Ri Bhoi mynta ka sngi ki la ïoh ban kem sa ar ngut ki suba don jingïadei bad saw ngut kiba la shah kem hadien ka jingbthei bom ha Them Metor ha ka 9 tarik Lber.
Ha u kyrwoh khubor mynta ka sngi, u SP ka Ri Bhoi, u Jagpal Singh Dhanoa, u la ong ba hadien ba ki la tohkit ïa kine ar ngut bad ïa kiwei pat, la lap ba ka seng Hynñiewtrep National Liberation Council ka la don bynta ban ïalam bakla ïa ka saiñpyrkhat jong ki samla ba lui-lui khnang ba ki kam dawa pisa be-aiñ jong kane ka seng kin bteng beit.
Ki pulit mynta ki dang wad jingtip la ki don ne em kiba kyrshan pisa ïa kane ka seng, bad lada lap ïa kino-kino kin sa shah pynshitom katkum ki kyndon aiñ.
Ki pulit ki la ïathuh ruh ba la pynrung ïa ka jingujor ha kaba ïadei bad ka jingpynher ïa ka lama jong ka HNLC ha ka surok bah National Highway ha Ri Bhoi ha u Nailar 2023.
Nalor kata, u SP u la ong ba ïa baroh ki kam be-aiñ jong ka HNLC la pynïaid lyngba ki rynsan ‘Social Media’. U la ong ba lada don kino-kino kiba ïoh khubor na ka HNLC ki dei ban pyntip sha ki pulit bad ha kajuh ka por ban khang noh ïa uto u ‘Mobile Number’ lane kiwei pat ki lad ki lynti kiba ka HNLC ka la pyndonkam ban ïakren bad ki.
Ha kane ka sngi ki pulit ki la pyllait paidbah ïa kaei kaba ki la kam ba ka dei ka jingïakren hapdeng uwei u samla na Ri Bhoi uba la shah kem bad uwei u briew ba la kynnoh ba u dei u Military Commander ka HNLC uba la tip kyrteng kum u Sanbor Pala.
