Shillong, Ïaïong:
U President ka National People’s Party (NPP) Meghalaya, Bah Prestone Tynsong, ha ka Sngi Ba-ar haba kynthoh jur halor ka jingkylla nongrim ka Voice of the People Party (VPP) halor ka ktien Hindi, u la ong ba ai ba ki paid nongjied kin buh jingkylli hi ïa ki nongïalam kane ka seng.
“Katkum ka jingsngew shimet jong nga, ka paw ba kane ka jingkylla nongrim ka VPP ka long thik kum ka ‘drama’, hapoh ïingdorbar thawaiñ ka jylla ki ong da kumwei katba shabar bad ha ka por ïalap ilekshon pat ki ong da kumwei. Kumta ngi ieh ha ka jingstad jong ki nongthep ‘vote’ bad ai ba ki nongthep ‘vote’ kin buh ïa ka jingkylli ha ka por kaba dei,” la ong u Bah Prestone haba kren sha ki lad pathai khubor.
Haba kylli, u Bah Prestone uba dei ruh u Symbud Myntri Rangbah ka jylla u la ong, “Ka la dei ka por ban kylli na ki, ngam don ban jubab eiei na ka bynta jong ki, namar nga ïohi ba ki jingkyrpad (appeal) ka VPP ruh la thoh ha ka ktien Hindi, ngam tip nangno ki ïoh ïa ki briew ba tbit ban pynwan ne pynkylla ïa ka jingthoh sha ka ktien Hindi, kumta kan bha ban kylli na ki.”
Haba pynpaw ba ka NPP ka ïeng ha ka nongrim na ka bynta ka bha ka miat ki paid ‘riewlum (tribal) ha baroh kawei ka Ri, u Bah Prestone u la ong ba ym kum ka VPP, haba ka ong ka ieid jaidbynriew ka long tang ha ki katto-katne ki district ka Meghalaya, katba ka NPP pat ym tang ha Meghalaya hynrei ha kylleng ki bynta jong ka Ri.
U la ong ba ka NPP ka pynthikna ba ki riewlum na Meghalaya, na ka thaiñ shatei lam-mihngi bad kumjuh ruh ha baroh kawei ka Ri, kin ïoh ïa ka jingïada ba pura long kat kaba long da ka Sorkar India bad ki Jylla ba ki don”.
