Shillong, Ïaïong 03
Ka Voice of the People Party (VPP) ha ka Sngi Balang ka la ther tyngeh ïa kito kiba kynthoh pyrshah ïa ka seng halor ka ktien ‘Hindi’.
“Kiba bun ki la kynthoh ïa ka VPP halor ka ktien ‘Hindi’. Ki shim ïa ki ‘non-issue’, ki pynlong ‘issue’ namarba kim don da kawei pat ka nia, kim don kawei pat ka nongrim ban kren. Ki shim ïa kiei-kiei ki bym myntoi bad kim da dei eh ba ngin ïakren ha ka jingïalap ilekshon sha Parliament,” la ong u nongaiktien ka VPP, Dr. Batskhem Myrboh haba ai jingkren ha ka jingïalang ha Jaïaw.
U la ong ruh ba kito kiba kynthoh halor katei ka bynta kumjuh u Symbud Myntri Rangbah ka Jylla, Bah Prestone Tynsong ki dei ban sngewthuh ba ka don ka jingïapher hapdeng ka ‘Official’ bad ka ‘Non-Official’.
“Ka VPP ka pyrshah ban pyndonkam da ka ktien ‘Hindi’ hapoh ïingdorbar thawaiñ – ka ban pyndonkam da ka ktien Phareng, Khasi ne Garo kum ka ‘Official’ bad ki ‘Associate Official Language’,” u la ong.
Haba pynpaw ïa ka jingpyrshah jong ka seng halor ka jingphah khnang ka Sorkar India da u Lat u bym nang kren Phareng sha ka Jylla, utei u nongaiktien u la ong, “Kane ka jingphah khnang jong ka Sorkar BJP ka long ban ïuh roit ïa ngi kum ka jaidbynriew. Kane ka long kum shi bynta ban pynbor ïa ka ktien ha ka Jylla.”
Ha kajuh ka por, u la pynshai ba ka jingpyrshah ïa ka ktien ‘Hindi’ ka dei namarba la leh ha ka kyrdan ‘Official’ hynrei lada dei ha ka kyrdan ‘Non-Official’, ka seng kan ym kren eiei halor kane ka bynta.
“Ïa kito kiba wohdong ïa ka VPP ba kumno kin leit sha Parliament…nga kwah ai ‘homework’ ïa ki. Nga kwah ïa ki ba kin pule ïa ka ‘Official Languages Act’ 1963 kaba kdew shai ba ha Parliament, ngi lah ban kren da ka ‘Hindi’ bad ka Phareng bad ki dei ban tip ruh ba ka don ka jingpynkylla na ka ktien ‘Hindi’ sha ka ktien Phareng bad na ka Phareng sha ka ‘Hindi’,” u la ong.
U la bynrap, “Nga tharai i Symbud Myntri Rangbah ka Jylla im tip ïa kane ka jingshisha, nga tharai ba in da tip ba i lah ban kren da ka ktien Phareng bad ba ka don ka jingpynkylla ktien na ka ‘Hindi’ sha ka Phareng kaba in sngewthuh, i nym ai lad ïa i Kong Ampareen ban ïaleh MP ruh, nga tharai i la ïaleh hi, i la bynnud tharai mynta, tangba ka por ka la dier.”
Shuh shuh u la kyntu ïa u Symbud Myntri Rangbah ka Jylla ban pule ruh ïa ka Meghalaya State Language Act, 2005.
