Shillong, Ïaïong 03
Ka sorkar Meghalaya ka la pynkynmaw ïa baroh ki nongtrei sorkar ïa ka hukum ba la pynmih ha ka 18 tarik Kyllalyngkot, 2023, ha kaba la ong ba ka long ka bakongsan ïa baroh ki nongtrei sorkar kiba don jingthmu ban leit shabar ri wat na ka bynta ki kam shimet ba kin ïoh jingbit lypa shwa na ka tnat Personnel & A.R. (A) hashwa ba kin leit jngoh ïa kino-kino ki Ri.
Ha ka hukum ba la pynmih biang ha ka 1 tarik Ïaïong, 2024, u Secretary ka tnat Personnel & A.R. (A), u Cyril Diengdoh, IAS, u la ong ba ki don ki nongtrei sorkar ki bym kheiñ snep ïa katei ka hukum ba la pynmih ha u Kyllalyngkot 2023.
Namarkata, u la ong ba la donkam ban pynkynmaw biang ïa baroh ki nongtrei sorkar kiba don jingthmu ban leit shabar ri wat na ka bynta ki kam shimet ba ki dei ban pan jingbit shwa na ka sorkar.
Ïa ki jingthoh ba pan jingbit, hap ban ai sha ki heh ophisar kiba khlieh ïa kito ki tnat, bad lah ban phah ïa kita ki jingthoh sha ki tnat ba dei peit. Kito ki tnat pat kin hap ban phah sha ka tnat Personnel & A. R (A) ka ban ai jingbit.
Ha ki jingthoh, ki nongtrei sorkar ki dei ban kdew shai ïa ka ne ki Ri kiba ki thmu ban leit jngoh, ki tarik ryngkat bad ka jingthoh ba ki pan shuti na ka bynta kito ki sngi ba kin ym don ha jingtrei.
La ong ruh ba hap ban phah jingthoh la kumno-kumno shi bnai shwa ban sdang ka jingleit jngoh shabar ri khnang ba ki bor ba dei khmih ki lah ban pyndep ïa ki jingdonkam bad kumjuh ruh ban lait na ka jingpynslem ban ai jingbit.
