Shillong, Ïaïong 03
Ha ka Sngi Balang ki nongïalam ka Khasi Students’ Union (KSU) Sengkmie lem bad ki nongïalam ka KSU South Khasi Hills District Unit ryngkat ka jingsynran lang ki bahaïing jong kiba la shah kem, ki la leit tur paidbah sha thanat Sohra.
Kane ka jingleit tur jong dkhot KSU ha kane ka sngi sha thanat Sohra ka long ban pan jingshai halor kano ka nongrim la kem ïa kitei ar ngut bad kaei kaba la pynlong ban leit kem ha ka por shiteng miet.
Lah ban pynkynmaw ba ki pulit ki la leit ban kem ïa ar ngut ki dkhot ka KSU South Khasi Hills District Unit halor ka jingshah pynïap jong ar ngut ki bar jylla ha Ichamati ha ka 27 tarik Lber.
Ha kane ka sngi, la sakhi ba ki pulit ki la syrtap bad pynkhlaiñ ïa ki bor pahara hapoh ka thanat Sohra hadien ba u President ka KSU South Khasi Hills District Unit u la pynbna ban tur paidbah ha kane ka sngi.
La sakhi ba ki pulit ki la khang sbak ha khyrdop ban rung sha phyllaw ka thanat ïa ki nongïalam ka KSU ba kynthup ïa u samla Rueben Najiar na ka Sengkmie, u President ka KSU South Khasi Hills District Unit u samla Ribokstar Diengdoh lem bad spah ngut ba kin rung sha phyllaw jong ka thanat. Ha kane ka por la mih ka jingpynnia kaba la neh kumba shiteng kynta eiei hapdeng ki nongïalam ka KSU bad ki pulit kiba khlem shah tdot ban rung paidbah sha phyllaw ka thanat.
Hadien ka jingïakren, ki bor synshar district ha ryngkat ki pulit ki la shah tang ïa katto-katne ngut ki nongïalam ka KSU ban rung shapoh thanat ban ïakren katba kiba bun ki dkhot ki la ap shabar.
Ynda la rung shapoh ka thanat, la sakhi ba la mih bad jur biang sa shisien ka thma ktien, haduh ba ki nongïalam ka KSU ki la bthah ïa uwei u heh pulit ba un mih shabar na kane ka jingïakren da kaba kynnoh ba u dei uba ju donkti ban ktah kti bad kren khor.
Hadien ba la dep ban ïakren bad mih noh napoh ka thanat, u samla Reuben Najiar haba kren sha ki dkhot ka seng bad ki paidbah kiba la wan ban synran, u la ong ba ka KSU ka kyntait ïa ka jingshah pharep ba ki dkhot jong ka seng ki dei kiba donkti ban pynïap ïa ar ngut ki bar jylla ha Ichamati.
U la ong ruh ba ka KSU ka buh u duk jingkylli ba balei da kem ïa ki bar jylla ym ju pynpaw kyrteng, katba da kem ïa ki Khasi pat la pynpaw bad kyrteng, jaka sah bad jaka trei.
“Ngi kwah ban ong sha baroh ki pulit ba ka aiñ ka long kumjuh ïa baroh, lada pynpaw kyrteng ïa ki dkhot ka seng dei ban pynpaw ïa ka kyrteng jong kito ki bar jylla ba la kem ha Ichamati, ym dei ban noh shiliang. Lada ka dang bteng kumne yn nym wan shuh kumne ban tur sha thanat hynrei ngin shim da kawei pat ka lynti,” la ong u samla Reuben.
Une u nongïalam ka KSU u la ong ba ka tnat pulit ka la batai shai sha ka KSU ba ki kem ym ba ki dei ki nongpynïap briew bad dei tang na ka jingsuba, hynrei ki pynpaw pat sha ki lad pathai khubor ba ki dei ki nongpynïap, bad kumta ha ka jingïakren ki ong ba lada lap ba kim don eiei ne donkti, kin pan map hakhmat ki lad pathai khubor.
Nalor nangta, u samla Reuben u la ong ka KSU na ka por sha ka por ka la ïohi ba ki dkhot ki shah kem, ki shah pharep ha ki pulit, ki shah bom shah tied, bad ki mukotduma ki ïaid da ki snem hynrei ym ju don ba lap ksai, la dei beit tang ka jingpharep.
“Ko ki pulit ngi batai shai ïa phi ba ka kamram jong phi ka dei ban peit ïa ka shongsuk-shongsaiñ, hynrei da kaba kem ïa ki dkhot ka KSU bad dkhot ka jaidbynriew wat mut ba kan don kata ka shongsuk-shongsaiñ hynrei kan don beit tang ka jingpynkulmar,” la ong u samla Reuben.
U la ong ba ïa ka rai ka seng mynta ka buh ha ka ïingbishar hynrei kum ka seng kin ïaleh ban ïoh pyllait jamin. U la ong ruh ba ki pulit kim dei shuh ban kem ïa ki dkhot ka KSU bad kan nym ailad ba kin kem tang haba ki suba jur. Lada ki dang bteng shiteng miet, kum ka KSU kan mih da kawei ka sur.
