Shillong, Ïaïong 03
Ka Voice of the People Party (VPP) ha ka Sngi Balang ka la ong ba ka saiñdur ne ka ‘Blueprint’ jong ka seng ka dei ka jingsynshar jong ka aiñ bad ka jingïaleh pyrshah ïa ka bamsap.
Halor ka jingpan ‘Blueprint’ jong u Symbud Myntri Rangbah ka Jylla, Bah Prestone Tynsong, u nongaitkien ka seng, Dr. Batskhem Myrboh haba ai jingkren ha ka jingïalang ha Jaïaw, u la ong, “Lada phi kwah pule ïa ka ‘Blueprint’, peit ïa ki mat jingkular (Manifesto) jong ngi bad sa khmih bniah. Hynrei ngam tip balei i jaituh haduh katta eh ba im lah ban pule ne im sngewthuh.”
“Ka ‘Blueprint’ jong ka VPP ka dei ka jingsynshar jong ka aiñ, ban synshar katkum ka aiñ bad da ka aiñ…kata ka dei ka ‘Blueprint’ jong ka VPP. Kam dei kata ka ‘High Level Rule’ ba synshar da ki ‘High Level’. Ha ngi, uba long Myntri Rang-bah lane u long u nongbylla sngi, ki ïaryngkat hakhmat jong ka aiñ, kata ka dei ka ‘Blueprint’ jong ka VPP,” la ong u Dr. Myrboh haba pynshai halor katei ka bynta.
U la ong ruh ba katkum ka United Nations la kdew ba ka jingsynshar katkum ka aiñ ka long kaba donkam eh khnang ban ïoh ïa ka roi ka par bad ban ïaleh pyrshah ïa ka jingduk ha ka Jylla bad ka Ri.
Haba kdew ba ka MDA-I bad II kim donkam ïa ka jingsynshar jong ka aiñ namar ka don kata ka ‘High Level Rule’ ne ka jingsynshar jong ki ‘High Level’, u nongaitkien ka VPP u la pynkynmaw halor kaei kaba jia ha Thangskai, East Jaiñtia Hills ha kaba ki paidbah kiba pyrshah ïa ka jingpynsngew paidbah jong kawei ka kompani dewbilat, ki la shah ban jubor ha ka Sorkar da kaba shah tied shah bom kaba la ïalam ruh sha ka jingmynsaw.
“Ïa kato la leh khnang ban ai kabu ïa kane ka kompeni dewbilat. Phi dei ban kynmaw ba kane ka kompeni hadien ka jingpynsngew paidbah ka noh synñiang `. 50 lak sha ka NPP. Kata ka dei ka rukom synshar ka jong ki. Ha ngi, ngin ym treh ban ai kum kato ka jingsynshar sha u paidbah bad ngi long pyrshah,” u la ong.
Ha kajuh ka por, haba kren halor ki Coke Factory ha East Jaiñtia bad West Khasi Hills, u la ong ba kine ki dei ki karkhana kiba mih khlem aiñ, bad kiba pynjot ïa ka mariang bad pynïoh pang ïa ki briew, hynrei ka Sorkar ka leh matlah halor kane ka liang.
“Haba ki briew ki ud ki nam, ki ïakhih, kam (Sorkar) ïohsngew, hap ban wan da ka ïingbishar bad ka phah ïa kitei ki karkhana ban khang noh. Ïa ka Jylla jong ngi la dei jingshisha ban synshar da kita ki nongmihkhmat kiba ngi la jied hynrei hap ban batai ïa ki da ki nongbishar,” u la ong.
Haba pynkynmaw biang ïa u Bah Tynsong kumjuh kito kiba pan ‘Blueprint’, u Dr. Myrboh u la ong ba haba phai sha ka jingtih dewïong be-aiñ, ka ïingbishar na ka por sha ka por ka hap ban tuklar naba ka don ka jingbamsap bad jingleh donbor ha kane ka bynta.
“Ïa kane, la pynmih na kawei ka por sha kawei ka por da ka hukum jong ka ïingbishar,” u la ong da kaba bynrap, “Ka ‘Blueprint’ jong ka VPP ka long ba ngin ïaleh pyrshah ïa ka bamsap.”
Nalor kane, u la ong ba ka ‘Blueprint’ jong ka VPP ka dei ka roi ka par na bynta u paidbah bad ym na bynta jongno-jongno.
Shuh shuh haba kynthoh ïa ki MLA bad Myntri kiba don ha ka liang synshar kiba ju beiñ bad kynnoh ïa ka VPP ba kim ai bai dawai, u la bynrap, “Kane ka dei ka jinglehraiñ ïa ka Sorkar bad kito kiba don ha liang ka Sorkar wat ban pynmih tang ïa kita ki kyntien.”
“Ka dei ka kamram ka Sorkar ban pynbiang ïa ki jaka sumar, ‘Dispensary’, CHC khnang ba kiba duk kim donkam ban leit khrong ban pynlong mraw ha kine ki ‘lei san snem. Kane ka dei ka kamram jong ki, ki dei ban pynbiang ïa u paidbah,” u la ong.
