Shillong, Ïaiong 03
U Working President ka Khun Hynñiewtrep National Awakening Movement (KHNAM), u Bah Thomas Passah u la pynrem jur ïa ka tnad pulit kaba la donkti ban kem ïa ar ngut ki dkhot ka Khasi Students’ Union (KSU) na Sohra khlem kino-kino ki sakhi-satar kiba biang halor ka jingshah pynïap jong ar ngut ki bar jylla ha Ichamati.
Kum ban shu pynkynmaw hangne, ka tnad pulit ha ka Sngi Ba-ar ka leit ban kem ïa ar ngut ki dkhot ka KSU na Sohra halor ka jingkynnoh ba ki la donkti ban shoh bad pynïap ïa ar ngut ki bar jylla ha ka thaiñ Ichamati ha ka 27 tarik u Lber.
U Bah Thomas u la ong ba ka shnong Ichamati ka la dei ka jaka kaba la jia shibun bha ki jingjia khamtam lei-lei ba ka la dei lypa ka shnong kaba don hajan ka khappud bad kawei ruh ka dei ka jaka kaba la shah bom pynïap u Bah Lurshai Hynñiewta uba dei uwei na ki dkhot ka KSU.
U Bah Thomas u la ong ba ka jingshah pynïap kitei ar ngut ki bar jylla ka long kaba sngewsih bad na ka liang ka KHNAM ruh ka pynrem halor kane ka jingjia pynïap briew. Hynrei ka jingkem pat jong ki pulit ïa ki ar ngut ki dkhot ka KSU ka long kaba khlem da pyrkhat bha bad u la ong ba hato ka tnad pulit ka la don ïa kita ki sakhi-satar kiba biang bha ban ong ba kitei ki dkhot ka KSU ki dei kiba donkti shisha ban pynïap ïa kitei ki bar jylla.
“Kumba ka paw katkum ka jingong jong ki pulit, ki la ong ba lada lap ba kitei ki dkhot ka KSU kim don jingïadei eiei halor ka jingjia, ki la ong ba kin pyllait noh. Katkum ka jingkren na ka liang ki pulit ka paw ba lehse, kim pat don ki sakhi-satar kiba biang. Kata ka mut ba hato ka jingkem beaiñ ka long bad hato ngin kyrshan beit ïa kata?”, la ong u Bah Thomas.
U la ong ba hadien katei ka jingjia shah pynïap kitei ki arngut ki bar jylla, ka jingkhmih lynti ka long ba ka tnad pulit ka dei ban khmih bad peit bniah bha shwa khnang ba kano-kano ka kam kaba ki shim ka dei ban long hadien ka jingpynshisha lyngba ki sakhi-satar kiba biang bha hynrei ka jingleit kem kynsan jong ki pulit pat ïa kitei ki arngut ki dkhot ka KSU khlem kino-kino ki sakhi-satar kiba biang kata ruh mynmiet-mynïong na ki ïingsah ka long ka jingleh kaba kyrkieh. Shuh shuh u Bah Thomas u la ong ba ka aiñ ka dei ban long kaba ryntih bad ha kaba ïadei bad ka jingshah pynïap jong u Bah Lurshai haduh mynta kam pat don satia kano-kano ka jingkem ïa ki briew kiba donkti.
“Ïa kano-kano ka jait pynïap, na ka liang ka seng jong ngi, ngim kyrshan hynrei ngi kwah ïa ka jingpynbeit ryntih ïa ka rukom pyntreikam ïa ki aiñ bad ha kine ki jingjia artylli, ngi ïohi ba ka don ka jingnoh shiliang ha ka rukom pyntreikam ïa ka aiñ”, la ong u Bah Thomas.
Ha kaba ïadei pat bad ka jingphah shithi jong ka Vishva Hindu Parishad (VHP) ha ka 2 tarik u Ïaïong 2024 sha ka President jong ka Ri, ka Droupadi Murmu ban tuklar halor ka jingjia shah pynïap jong kitei ar ngut bar jylla ha kaba ka la dawa ba ka dei ban phah tohkit da ka kynhun tohkit ba laitluid ne da ka CBI/NIA ha ryngkat ka jingong ba katei ka jingpynïap ïa kitei ar ngut bar jylla ka long kaba shyrkhei bha. Ha katei ka shithi ka VHP ka la dawa ruh ba kitei ki longïing-longsem jong kitei ki bar jylla ki dei ban ïoh ïa ka bailutksan, ka kam ka jam bad ka jingïada. Kumta na ka liang u Bah Thomas u la ong ba ha ka por ba jia ka jingshah pynïap ïa u Bah Lurshai kam shym la don kano-kano ka jingsiew ïa ka bailutksan na ka liang ka sorkar sha katei ka longïing jong u Bah Lurshai.
U Bah Thomas u la ong ruh ba kane ka kynhun VHP la katto-katne ka la pyrshang bha tuklar ïa ki kam jong ka jylla bad ka jingleh jong kane ka kynhun VHP ka pynpaw shai kdar ba ki dei ki RSS.
“Kine ki dei ki seng kiba nabar jong ka jylla kiba pyrshang ban wanrah ïa ka jingïapher jaitbynriew hangne hapoh ka jylla jong ngi hynrei ka kamram ka dei jong ka sorkar kumno ba kan shimkhia ïa kine ki kynhun kiba nabar kiba pyrshang ban wanrah jingklumar hapoh ka jylla jong ngi”, la ong u Bah Thomas.
U la ong ba kum kane ka seng VHP, ka jylla kam don jingithuh satia namar ki dei kita ki seng ki bym don dur don dar bad kum kine ki jait seng, ym dei ban kheiñkor bad ym don satia ka jingithuh ïa ki namar ka dei ka seng kaba nabar ka jylla kaba thoh ïa ki jingthoh kiba pynshoit bad pynïapher jaitbynriew kaba ïalam bakla ïa ka ophis jong ka President ka Ri bad ki nongïalam jong ka Ri baroh kawei.
