Shillong, Ïaïong 03
Ka jingkem ïa ar ngut ki dkhot ka KSU na South Khasi Hills ka dei tang halor ka jingsuba bad ym dei ba kynnoh nongpynïap briew naba ym pat lap sabut satia ban pynshisha ba ki donkti, la pyntip ki nongïalam ka Khasi Students’ Union (KSU) ba ong u Sub Divisional Police Officer (SDPO) ka Sohra Civil Sub Division.
Haba pyntip halor kane, u Assistant General Secretary ka KSU Sengkmie u samla Reuben Najiar, u la ong ba u SDPO u la ai ka jingkular ba ki pulit kin ym kem shuh ïa ki dkhot ka KSU halor ka jingjia ha Ichamati hynrei lada donkam ban tohkit, kin sa shu khot hajir ban kylli jingkylli.
Kane ka jingpyntip na ka liang jong ki nongïalam ka KSU ka la long ha ka Sngi Balang hadien ba ki la hiar ban leit synran ïa ki nongïalam bad dkhot ka KSU-South Khasi Hills kiba la leit ban tur sha thanat ha Sohra ban pan jingpynshai na ki pulit halor ka jingshah kem jong ar ngut ki dkhot ka seng.
U samla Reuben u la pyntip ïa kane sha ki paidbah kiba la ïatur lang sha thanat ha Sohra hadien ka jingmih na ka jingïakren bad ki pulit bad ong ba u SDPO u la batai shai ba ka jingkem ïa ki dkhot ka dei tang namar ka jingsuba bad kam pat don satia kano-kano ka sabut ban pynshisha ïa ka jingdonkti jong ki.
U samla Reuben u la pyntip ruh ba nalor kane, u SDPO u la pynthikna ba kan ym don shuh ka jingkem ïa ki dkhot ka KSU ne ka jingleit thwet ïa ki dkhot ka KSU ha ka por mynmiet ne shiteng synñia.
Katba na ka liang u President ka KSU South Khasi Hills u samla Ribokstar Diengdoh u la ong, lada ki pulit ki dang bteng ban khynra ne kem ïa ki dkhot ka seng, ka KSU kan ïawer ïa baroh ki dkhot ka jaidbynriew ba kin mih ha man la ki jaka.
