Jowai, Ïaïong:
U Myntri ka sorkar jylla, u Bah Comingone Ymbon, uba long ruh u MLA ka Raliang, haba pan jingkyrshan na ka bynta ka kyrtong MP ka seng National People’s Party (NPP), ka Kong Ampareen Lyngdoh, u la kyntu ïa ki samla ka Rilum Jaiñtia ba kim dei ban shah ïalam bakla ha ‘U Prah’ (Voice of the People Party – VPP).
Ïa kane u Bah Comingone u la kren ha ka jingïalang ïalap ilekshon ka NPP kaba la long ha Indoor Hall Ladthadlaboh, Jowai ha ka Sngi Ba-Ar.
U la ong ba ki samla kim dei ban shah ïalam bakla ïoh ba ha kawei ka sngi kin shah tap kylla ha u Prah uba long kum khiew thylli uba sawa tang ka sur.
Nalorkata, u Bah Comingone u la kyntu ïa ki longkmie- longkpa ban sneng ban kraw ïa ki khun ki jong ki ban ai ka jingkyrshan ïa ka NPP kaba la don lypa hapoh ka sorkar.
“Ngi la jied ïa ka longkmie kaba kynsai tam ban long ka kyrtong jong ka NPP na ka 1-Shillong Parliamentary Constituency, bad kumta ngi khot ngi wer ïa ki nongshong shnong ka Rilum Jaiñtia ba mynta u snem ha kane ka ilekshon ngi kwah ban ïohi ba ka ‘vote’ na Rilum Jaiñtia kan long 95% ban kyrshan ïa ka NPP,” la ong u Myntri.
Haba kynthoh shaphang U Prah, u Bah Ymbon u la ong ba lada peit ha ki ‘Social Media’, la ïohi beit sa tang shaphang U Prah, bad ha ka jingïalap ilekshon ka jong ki (VPP), ki imsngi tang ha ka jingkynnoh kynthoh ïa kiwei ki seng khamtam ïa ka NPP.
Nalorkata u la ong ba u Bah Ardent u la kam ba u la leh shibun ki kam na ka bynta ka imlang-sahlang bad u dei ruh u MLA uba pyndonkam hok ïa ka skhim MLA.
“Lada lah ban pynhun ïa ka Constituency tang na ka MLA skhim, lada jied da uno-uno u briew ruh un nang beit ban pyndonkam ïa ka MLA skhim,” la ong u Bah Comingone bad bynrap ba u Bah Ardent u long u briew uba donbok shibun ban ïoh ïa ka Constituency kaba hun tang na ka MLA skhim ka jong u khlem da donkam ïa kiwei kiwei de ki kam pynroi hapoh ka Constituency.
