Shillong, Ïaïong:
Ka Hynñiewtrep Youths’ Council (HYC), Sengkmie ka maham tyngeh ïa ka ABVP bad ka World Organisation of Students and Youths (WOSY) ban ym pyndonkam ïa ka NEHU na bynta ki ‘agenda’ politik ne wanrah ïa kino-kino ki jingsngewpher jaidbynriew hapoh ka skulbah.
“Ka HYC ka maham ïa ka ABVP bad WOSY ban long kiba husiar bad ym ban pyndonkam ïa ka NEHU ban ïaid shakhmat bad ki agenda politik jong ki bad ban wanrah ki jingsngewpher jaidbynriew hapoh ka skulbah,” la ong u Education Secretary ka seng, samla Enlang Sawian ha ka kyrwoh khubor.
U la ong ruh ba ka seng kan ym shah ïa ki briew ne kynhun kiba don jingthmu ban thap myntoi shimet ne ban pynthohbria ïa ka kyrteng jong ka NEHU bad ka Jylla naba ka NEHU kam ju shah ïa kiba kum kitei ki kynhun ban shim bynta ha ka politik jong ki samla pule haduh mynta bad ka seng ka kwah ban ïohi ba ka ‘status quo’ kan ïai neh ha ki snem ban wan.
“Ngi kyntu ïa man la iwei-pa-iwei na ki samla pule jong ka NEHU ban long kiba peitngor bad leh ïa kaba donkam ban pyntikna ba ka skulbah ka lait na ki ‘agenda’ politik jong kiba kum kine ki kynhun ne briew,” u la ong.
Ha kawei ka liang, ka seng haba pynpaw ka jingpyrshah jur halor ki jingjia ba dang shen ha NEHU, ka la ong ba ka la ïoh jingtip ba ka ABVP, ka seng samla pule jong ka BJP ka pyrshang ban bsuh khlieh hapoh ka skulbah da kaba pyndonkam ïa ka WOSY kumjuh da kaba pynlong ïa ki prokram (kum kaba la shah pynsangeh dang shen ha ka seng) ha ryngkat ka jingïasnohktilang bad ka RSS.
“Ka jingrakhe ïa ka tamasa ‘Holi’ hapoh skulbah da ka WOSY ha ryngkat ka jingïasnohktilang bad ki dkhot ka ABVP/RSS kam dei kaei-kaei hynrei ka jingpyrshang ban wanrah ïa ka jingsngewpher jaidbynriew ha kane ka tamasa kumjuh ban leh politik halor kane kajuh ka bynta,” la ong u samla Sawian.
U la ong ruh ba ha baroh ki snem kiba la leit, ki samla pule bad ki nonghikai lem bad ki nongtrei ka NEHU ki ju pynlong ïa kiba kum kitei ki tamasa ha la i bor shimet bad kam shym la don kano-kano ka jingpyrshah, hynrei ka jingrakhe ïa kane ka tamasa da ka jingthmu ban wanrah ka jingsngewpher jaidbynriew bad jingleh politik, ka seng kam lah pdiang satia ïa kane.
“Ngi la ïoh jingtip ruh ba ym shym la ai jingbit ïa ka WOSY na bynta ban pynlong ïa kaba kum katei ka prokram bad ban rakhe ïa kane ka tamasa bad ki briew ki bym dei ki samla pule jong ka skulbah hapoh ki sawdong-sawkun jong ka,” u la ong.
Kumta, ka seng ka kyrshan pura ïa ka nongrim ba la shim da ki nongkitkam jong ka NEHUSU bad pynrem jur ïa ka jingleh jong baroh kiba donkti ban thombor ïa u Vice-President ka NEHUSU.
“Ngi kyntu ïa ka tnad pulit ban leh eiei noh mardor da kaba pynngat ïa ki runar kiba donkti ha katei ka jingjia katkum ki kyndon jong ka aiñ bad kyntu ruh ïa ki bor pynïaid ka NEHU ban pynshitom pyrshah ïa ki nongpynïaid jong katei ka prokram lym kumta, ka HYC kan sa shim la ka jong ka sienjam ban pyntikna ba ki lanot ki ïoh ïa ka hok kumjuh ban pyntikna ba ka skulbah ka pynshitom ïa ki nongpynïaid,” la ong utei u nongïalam.
Shuh shuh u la bynrap ba ka seng ka buh jingmut halor ka jingpyrshang ka ABVP ban ïoh bsuh khlieh hapoh NEHU (Tura bad Shillong) da ka jingthmu ban pynsaphriang ïa ka politik jong ka jingisih kumjuh ban wanrah ïa ki jingsngewpher jaidbynriew da kaba pyndonkam ïa ka WOSY, naba kam ïoh lad ban bsuh khlieh hi da lade – kaba kynthup ruh ïa ki samla pule na Bangladesh kum u Jurak kiba katkum ki jingtip ba la ïoh lum u la ngat ha kiba bun ki mukotduma thombor kiba sahteng pyrshah ïa u.
“Ka ABVP ka pyrshang ban pynkup bor ïa kine ki jait briew ban ïoh rung hapoh skulbah kumjuh ban sdang ïa ka politik jaboh jong ki hapoh skulbah,” u la ong.
