Shillong, Ïaïong:
Ka Sorkar Jylla ka dang pyrshang ban ïoh ïa ki nongpynïaid liengsuiñ ban pynïasoh na Kad Liengsuiñ kaba don ha Umroi sha kiwei pat ki nongbah kiba kham bun ki nongleit jingleit na kane ka Jylla nalor ka nongbah Delhi khamtam sha Mumbai, Bangalore bad Hyderabad.
U Commissioner and Secretary uba peit ïa ka tnat Transport, u Sanjay Goyal u la ïathuh ba mynta dang ap ban ïoh ïa ki nongpynïaid liengsuiñ na ka bynta ka jingpynïasoh hapdeng ka Umroi bad kitei ki nongbah kiba la kdew haneng.
U Goyal u la ïathuh ba ki nongleit jingleit na Jylla ki bun bha kiba leit sha kitei ki nongbah nalor ka nongbah Delhi bad lada lah ban pynurlong, wat ki briew na kiwei ki Jylla kiba wan sha Meghalaya kum ki nongjngohkai ruh ki kwah ban wan lada don liengsuiñ kaba pynïasoh beit-beit hapdeng kitei ki nongbah bad ka nongbah Shillong.
U la ong ba ki nongleit jingleit da ka liengsuiñ ki kham mon ban leit jingleit lada ka don ka liengsuiñ kaba pynïasoh beit-beit ban lait lutksan.
U la ong ba ka Sorkar ka la mang lypa ïa ka pisa lyngba ka Viability Gap Funding (VGF) ban siew sha ki nongpynïaid liengsuiñ ha kaba bai liengsuiñ kan long beit `.7000 marwei lada dei ban shim liengsuiñ ha kano-kano ka por ba thmu ban leit jingleit ym kum ha kiwei ki kad liengsuiñ ha kaba ka bai shong liengsuiñ ka ïapher khamtam lada ot tiket liengsuiñ khyndiat sngi shwa ban leit jingleit lane khyndiat kynta shwa ban leit jingleit.
U Goyal u la ong ba ka don ruh ka jingthmu ka Sorkar ban pynïaid liengsuiñ noh man la ka sngi hapdeng ka kad liengsuiñ ha Umroi bad ka nongbah Delhi.Kumba ka long mynta ka liengsuiñ na Umroi sha Delhi ka dei tang ar sien shitaïew.
