Shillong, Ïaïong 03
Ka East Khasi Hills district kaba kham bun eh ki konstitwensi ka la ïoh 8 pyrton ki pulit Central Armed Police Force (CAPF) na ka bynta ban pynlong ïa ka ilekshon sha Ïingdorbar Lok Sabha ha Shillong Parliamentary konstitwensi ha kaba ka jingthep ‘vote’ kan long ha ka 19 tarik u Ïaïong.
Ka East Khasi Hills district ka don 17 tylli ki konstitwensi MLA hapoh ka Shillong Lok Sabha konstitwensi bad kham hashwa, la pan kumba 18 pyrton ki pulit CAPF ban pahara ha kylleng ki jaka thep ‘vote’ ha kane district na ka bynta ka jingpynlong ïa ka ilekshon sha Ïingdorbar Lok Sabha ha Shillong Parliamentary konstitwensi ha kaba ka jingthep ‘vote’ kan long ha ka 19 tarik u Ïaïong.
U Superintendent of Police (SP) ka East Khasi Hills district, u la ong dang shen la mang 6 pyrton ki pulit CAPF bad mynta la dep mang biang sa 2 pyrton kaba long baroh 8 pyrton nalor ki pulit ka Jylla kiba la don lypa.
Nalor kine kiba la dep mang, kiba la don lypa ki long 3 pyrton ki pulit CAPF kiba kynthup ïa ki pulit CRPF.
Ka Shillong Parliamentary konstitwensi ka kynthup ïa ki 36 tylli ki konstitwensi MLA bad tang ha East Khasi Hills district ki don 17 tylli ki konstitwensi MLA.
Ka tnat pulit ka la don ruh ki kynhun Flying Squad Team bad ki Static Surveillance Team katkum ki jingbthah ka Election Commission of India.
