Shillong, Ïaïong 03
U MP ka Lok Sabha na Shillong Konstitwensi bad uba dei kyrtong ka Congress ha kane ka ilekshon kaba mynta u Bah Vincent Pala, u la ong lada ki paidbah ki jied ïa ka seng NPP ka long kumba ki tih thliew ïalade namar ka NPP ka dei ka syrngiew jong ka BJP.
Ïa kine ki kyntien u Bah Pala u la kren ha ka jingïalang ha ïew Jatah ha ka 3 tarik Ïaïong kaba hap ha Mawkynrew konstitwensi.
Ha kane ka sngi la ïadonlang u MDC ka Pynthorumkhrah-Mawkhar konstitwensi, Bah Pynshngaiñ N Syiem, Bah Hilarious Warbah, ki nongkitkam bad ki paidbah.
U Bah Pala u la ong ba ka BJP ka buh thong ban jop bun ngut ki MP ha kane ka ilekshon ban pynlong kawei ka niam Hindu, ban kren tang ka ktien Hindi.
U la ong ba dei tang ka seng Congress kaba lah ban ïakhun ïa ka seng BJP ha Delhi bad kumta u la ong ka lawei jong ka ri bad ka jaidbynriew ka shong ha ka bor jong ki paidbah ban rai ha ka 19 tarik mynta u bnai.
Nalor nangta, u la pynshai ba ym lah ban shu kren katba mon ha Parliament, hynrei hap shu khalai nusip ïa ki jingkylli ba la buh da ki MP, kata kiba ïoh kren kin long tang 20 ngut ha ka shisngi.
“Ki ong ba ngam ler, lada ngam ler tharai ngam shym la shah jied ban long General Secretary na ki 39 ngut ki MP ha ka thaiñ Shatei Lam Mihngi, hynrei naduh dangrit nga dei u briew uba trei shitom haduh ban da poi sha ka saiñpyrthei” u la ong.
U la pynshai shuh shuh ba ïa ka skhim kaba ka sorkar India kam shym la pyllait thikna naduh ba la wan ka khlam Covid-19 bad haduh mynta u snem haba la dei ka por ban jied thymmai ïa u MP sha ka Lok Sabha.
U la ong ba ha ka ilekshon ba la dep ki paidbah ki la kyntait ïa ka BJP bad mynta kane ka seng ka la rung lyngba ka NPP bad kino-kino kiba la ñion ïa ka NPP ki la tih thliew ban pynshitom ïalade.
Shuh shuh u Bah Vincent u la kynnoh ba ka BJP ka kwah ban jop 370 ngut ki MP namar ki kwah ban pynkylla ïa ka riti synshar jong ka ri India, kata ka long ban pynlong kawei ka ktien, kawei ka niam bad kawei ka kolshor hapoh ka ri India.
Namar kata, ban ïakhun ïa ka bor jong ka BJP dei ban thep beit ïa ka seng Congress ha Shillong bad Tura konstitwensi.
