Shillong, Ïaïong:
Ka NPP ha ka Sngi Ba-ar ka la nang ïoh bor bad nang khlaiñ hadien ka jingwan pynïasoh jong ki nongïalam bad nongkyrshan na ka TMC, UDP bad Congress kiba na ka Mawryngkneng Konstitwensi.
Ka jingwan pynïasoh jong ki nongkyrshan na kitei ki 3 tylli ki seng sha ka NPP ka long ban kyrshan ïa ka kyrtong ka NPP ka Kong Ampareen Lyngdoh ha kane ka ilekshon MP na Shillong Parliamentary.
Ka jinglah jong ka NPP ban khring ïa kine ki nongïalam ka TMC, UDP bad Congress na Mawryngkneng, ka la dei lyngba ka jingtrei shitom jong u MDC ka thaiñ u Bah Pynïaid Sing Syiem, uba dei ruh u CEM ka KHADC.
Ïa kine ki nongkyrshan la pdiang sha ka NPP da u Working President ka NPP Meghalaya Bah Hamletson Dohling, u Nongaiktien ka NPP Bah HM Shangpliang, u CEM KHADC Bah Pynïaid Sing Syiem lem bad kiwei kiwei ha ka jingïalang ba la pynlong ha ophis treikam ka NPP ha Lachumiere.
Haba kren sha ki lad pathai khubor u Bah HM Shangpliang u la ong, kine kiba la wan rung sha ka NPP ki dei kiba la wan ban ai jingkyrshan ïa ka kyrtong MP ka NPP na Shillong Parliamentary Konstitwensi ka Kong Ampareen Lyngdoh bad ban pynkhlaiñ ïa ka NPP.
U la pyntip ruh ba nalor kine kiba la rung ha kane ka sngi, yn sa pdiang burom sa ïa kiwei ki nongïalam bad nongkyrshan da ki spah ngut sha ka NPP ha ka jingïalang ka ban long ha ka 6 tarik mynta u bnai ha Mawryngkneng.
Shuh shuh u Bah Shangpliang u la ong, ka NPP katba nang mih ki sngi ka la nang ïoh bor bad nang khlaiñ ha kylleng ki bynta jong ka Meghalaya bad khamtam da ka jingwan rung ki nongïalam bad ki nongkyrshan na kiwei ki seng kan pyntikna ba ki kyrtong ka NPP kin jop ha kane ka ilekshon.
