Jowai, Ïaïong 03
Ka ïingkashari jong u Sessions Judge, West Jaiñtia Hills, ka la pynrem ïa uwei u briew uba la donkti ban pynïap ïa uwei pat bad ka la pynbna ba ka jingpynsaja ïa une u nongpynïap briew ka dei ban set along ïa u shi jingim bad un hap ban siew ruh ïa ka kuna kaba T.3 lak sha ki bahaïing hasem jong u briew uba u la pynïap.
Ha kaba ïadei bad kane, u SP ka West Jaiñtia Hills, ha ka Sngi Balang u la pyntip ba dei ha ka 6 tarik Nailur, 2005 ba ki pulit ki la ïoh pdiang ïa kawei ka ejahar na u (L) Bah Linus Sumer, uba dei u kpa jong uba shah pynïap, u (L) Rishanki Biam.
Ha kata ka ejahar, la kynnoh ba uwei u briew ïa uba la tip kyrteng kum u Aloi Suiam, u la pynïap ïa u khun jong u ha ka shnong Saphai.
Ïa kane ka ejahar la pynrung ha thanat Jowai bad ïa ka jingtohkit la leh da u Sub-Inspector B Singh.
Ha ka 28 tarik Lber, 2024 ka ïingkashari jong u Sessions Judge, West Jaiñtia Hills District, hadien ba la ïoh pdiang ïa ki sabut, ka la lap ba u Aloi Suiam u dei uba donkti ban pynïap ïa u (L) Rishanki Biam.
Namarkata, ka ïingkashari ka la pynsaja ïa u Aloi Suiam hapoh ka kyndon 302 IPC bad ka la pynbna ba un hap ban shong patok shirta jingim, bad un hap ban siew ruh ïa ka kuna kaba T.3 lak sha ki bahaïing hasem jong u (L) Rishanki Biam.
