Nongstoiñ, Ïaïong 03
“Ka jinglah ban pynïapher ïa ka jaidbynriew Khasi na kiwei pat ki jaidbynriew ka dei ka riti ka dustur bad ka jingshim jait na ka kmie kaba u longshwa-manshwa u la leh da ka jingshemphang,” la ong ka Kong Badariti Lyngdoh Nonglait haba kren bad pynshai sha ki paidbah ha ïew Rambrai ha ka jingïalap ilekshon MP na ka bynta u kyrtong ka Regional Democratic Alliance (RDA) ha ka Sngi Balang.
Ka Kong Badariti ka la ong kaba sngewsih ha kine ki sngi kiba mynta la mih pynban u nongshun na la ïing uba mut ban pynkylla khongpong ïa ka riti ka dustur, la mih ki nongïalam kiba kren ieid jaidbynriew kiba da pynum shisha ïa ka mynsiem na ka jingkren ieid jaidbynriew ka jong ki, pynban im-im peit-peit ki mut ban pynkylla khongpong ïa ka riti ka dustur.
Shuh shuh ka la ong ruh ba ha kine ki sngi ka jingïashongshit bad jingïabiej ki paidbah ïa kata ka seng thymmai kaba la mih ruh ka jingong ba ka dei ka seng ka sur u paidbah ha kaba bunsien ki ju ong ruh ba ka sur u paidbah kadei ka sur ka jong ki Blei, hynrei ko ki paidbah da bishar ïoh ba kata ka sur u paidbah kadei kylla ka sur u paidbhur.
Ha kawei pat ka liang, u Bah Robertjune Kharjahrin uba dei u kyrtong ïamonlang ka RDA ha ka jingkren u la pynshai halor ki nongrim kaba kum u kyrtong u don ïa ka thong.
U Bah Robertjune u la kyrpad ïa ki paidbah ba kin ailad ïa u, ba un poi sha ka thong bad ba un ïeng ban ïada ïa ka hok ka jinglong trai ïa ka khyndew ka shyiap, ban pynkhlaiñ shuh shuh ïa ka District Council bad kumjuh ruh ban ïoh laitluid ha ka ban shakri ne mane Blei.
Ha kane ka sngi la ïadon lang ruh u Bah KP Pangniang, President ka HSPDP, u Bah Metbah Lyngdoh, President ka UDP nalor kiwei kiwei kiba la ai jingkren ruh ban pynshai sha ki paidbah halor ki nongrim bad ki jingthmu.
