Shillong, Ïaïong 03
U President ka NPP Meghalaya, Bah Prestone Tynsong bad uba dei u Symbud Myntri Rangbah, u la ong ba u President ka Voice of the People Party (VPP), Bah Ardent Basaïawmoit uba dei u MLA ka Nongkrem konstitwensi, u kwah ban pynduh noh ïa ka District Council namar u kwah ban ai jait noh sha u kpa.
U Bah Prestone u la kren ïa kane haba leit pan jingkyrshan ïa ka Kong Ampareen Lyngdoh kaba dei kyrtong ka NPP na Shillong konstitwensi ha ïew Jatah kaba hap ha Mawkynrew konstitwensi, East Khasi Hills ha ka 3 tarik Ïaïong.
Ha kane ka sngi la ïadonlang u MLA ka Mawkynrew, Bah Bantei-dor Lyngdoh, Bah Kansing Lynshiang bad ki nongkitkam ka NPP.
U Bah Prestone u la ong ba u Bah Ardent u kwah ban wanrah ïa ka Article 371 ban pynduh noh ïa ki District Council, hynrei um tip ba dei lyngba ka jingdon ka District Council la lah ban ïada ïa ka khyndew ka shyïap ka riti-dustur bad ka jinglong kyrpang ka jaidbynriew.
U la ong ban ieid jaidbynriew dei ban pynkhlaiñ ïa ki ïing ki sem namar ka sorkar mynta ka la ai jingïarap ïa ki 1800 tylli ban shna ïa ki ïing kiba duk ha Mawkynrew Block, kane keiñ ka dei kata ka jingieid jaidbynriew.
U la kynnoh ruh ba don ki nongkyrshan ka VPP kiba la shongshit khlem nongrim ki la pyrta Prah ruh mar shu dep rwai ‘choir’ hynrei to tip lada phi pyrta ha u Prah hynrei ïa ka ‘vote’ dei ban ñion beit ha ka kot.
U la ong ba kane ka umsaw ka dei ban kut noh ha ka 18 tarik mynta u bnai, bad ha ka 19 tarik pat kan wan noh ka jingkyrmen namar kine ki briew ki shu ang la ka ang ka shyntur namar kim pat ïoh shong shuki.
Katba na ka liang u MLA ka NPP, Bah Banteidor Lyngdoh, u la ong ba tang namar u ieid jaidbynriew u hap shong patok haduh ar snem namar u rah suloi.
U Banteidor u la pynpaw ïa ka jingieid jaidbynriew namar lah don kiwei ki seng kiba wan ïalap ilekshon ban kren ieid jaidbynriew.
U Bah Kansing Lynshiang uba dei u nongkitkam ka seng NPP, u la ong ba kita ki briew kiba kam ïalade ban ieid jaidbynriew u jah ha ka por ba wan ka khlam covid namar um shym la ai jingïarap ïa ki paidbah hynrei mynta haba u wan ïalap ilekshon u kren ieid jaidbynriew.
