Shillong, Ïaïong 08
U MP ba mynta ka Shillong Parliamentary Constituency, bad uba dei ruh u kyrtong ka seng Congress ha kane ka ilekshon MP Lok Sabha, u Bah Vincent H Pala, u la paw kyrteng kum uwei napdeng ki 10 ngut ki kyrtong ba riewspah tam ha ka Ri India.
Ka Association for Democratic Reforms (ADR) bad ka ‘The National Election Watch’, hadien ka jingpeit bniah ïa ki kot ki sla (Affidavit) jong ki 1,618 na ki 1,625 ngut ki kyrtong Lok Sabha ha ka bynta banyngkong jong ka ilekshon, ka la pynbna ba u Bah Pala u don ha ka kyrdan kaba 8 napdeng 10 ngut ki kyrtong kiba riewspah tam na ki jylla kiba ka jingthep ‘vote’ kan long ha ka bynta banyngkong.
Kitei ki kyrtong ki dei kiba la thep kyrteng na ki 102 tylli ki konstitwensi kiba don ha ki 21 tylli ki jylla ha kaba ka jingthep ‘vote’ kan long ha ka 19 tarik Ïaïong.
Nalorkata, la ong ba nalor u Bah Pala, napdeng ki 10 ngut ki kyrtong ki ban ïa aireng ha kane ka ilekshon MP na Meghalaya ba kynthup ïa 6 ngut na Shillong bad 4 ngut na Tura, 7 ngut ki dei kita ki ‘Crorepati’ lane ki briew kiba ka jingdon-jingem bad ka spah ka phew ka la kot palat ` 1 klur.
Ka jingdon-jingem bad ka spah ka phew jong u Bah Pala, katkum ba u la pynpaw ha ki kot ki sla jong u, ka la kot sha palat T. 125 klur. Uba wan ba ar ha Meghalaya u dei u kyrtong ka All India Trinamool Congress na Tura, u Zenith M Sangma, ha kaba ka jingdon-jingem bad ka spah ka phew kaba u la pynpaw ka la kot palat T. 11 klur.
Hadien jong u Zenith, wan sa u kyrtong khlem seng (Independent) na Shillong, u Prof. Lakhon Kma, uba la pynmih ba ka jingdon-jingem bad ka spah ka phew ka la kot palat ` 5 klur.
Uba wan ha ka kyrdan ba saw napdeng ka jingbun spah, u dei u kyrtong ka seng Congress na Tura, u Saleng A Sangma, ha kaba u la pynpaw ba ka spah ka phew bad ka jingdon-jingem ka la kot palat T. 4 klur.
Hadien jong u Saleng, ka MP ba mynta ka seng NPP na Tura bad kaba long ruh ka kyrtong ha kane ka ilekshon, ka Agatha K Sangma, ka la wan ha ka kyrdan kaba san ha kaba ka jingdon-jingem bad ka spah ka phew jong ka, ka la kot palat ` 3 klur.
Ka kyrtong ka seng NPP na Shillong, ka Kong M Ampareen Lyngdoh, ka la wan hadien jong ka Agatha ha kaba ka spah ka phew bad ka jingdon-jingem ka la kot palat ` 2 klur.
U kyrtong ka seng VPP na Shillong, u Dr Ricky Andrew J Syngkon, u don ïa ka spah ka phew bad ka jingdon-jingem kaba la kot palat T. 1 klur katba u kyrtong ka UDP, u Bah Robertjune Kharjahrin, u don palat T. 98 lak ha liang ka spah ka phew bad jingdon-jingem. Hadien jong u Bah Kharjahrin, wan sa u Bah Peter Shallam, u kyrtong khlem seng na Shillong, ha kaba ka jingdon-jingem bad ka spah ka phew ka kot sha palat T. 4 lak eiei.
U barit duh ha ka jingdon-jingem bad ka spah ka phew napdeng ki 10 ngut ki kyrtong MP na Meghalaya u dei u kyrtong khlem seng na Tura, u Labenn Ch. Marak, ha kaba u la pyni ba ka jingdon-jingem bad ka spah ka phew ka kot tang sha ka T. 63,800 eiei.
