Mairang, Ïaïong 15
Ha ka Lah Sngi U Blei jong ka taïew ki la don lai tylli ki seng saiñ hima-sima kiba kynthup ïa ka National People’s Party (NPP), Congress bad ka Voice of the People Party (VPP) ki la ïeng rynsan ha ka shnong Kynshi Mawria ha Eastern West Khasi Hills ban pynpaw sha ki paidbah halor ka ilekshon MP sha Lok Sabha na ka bynta ki kyrtong la jong ban ïakhun ilekshon.
Wat la na baroh kitei lai tylli ki seng saiñ hima-sima ym shym la wan mihkhmat da ki kyrtong hynrei la wan mihkhmat da ki nongïalam jong kitei ki seng kiba la ai ïa ka jingkren. Na ka liang ka Congress la mihkhmat da u Bah J.A Lyngdoh, MLA barim, na ka NPP da u Bah Prestone Tynsong, President ka NPP Meghalaya bad na ka VPP la ai jingkren da ka Kong Aibandaplin Lyngdoh Nonglait.
U Bah JA Lyngdoh haba kren ha ka jingïalang u la ong ba ka jingkren u Myntri Rangbah ha ka jingïalang paidbah kaba la long ha Upper Mawprem ha kaba u la kyrpad na ki paidbah kiba kyrshan ïa ka BJP ba kin ai ka jingkyrshan ïa ka kyrtong NPP namar lyngba ka NPP kan pynjop ïa u Modi ba un long biang u Myntri Rangbahduh ka Ri India sa shisien. U la ong kane ka khubor ka la phriang lut sha ‘social media’ ha kaba la ïohi lut baroh ki paidbah ka Ri Khasi Jaiñtia kiba la ong pleng ka NPP ka dei hi ka BJP, tangba ka shu leh mynleh baroh shi katta mynta te mih pyrthei ba la pynbna da u Conrad ba ki ïa long shipara la bun bun snem ha Delhi.
U Bah Lyngdoh u la pynpaw ruh ba lada ka BJP ka wan biang ha ka bor, ka riti synshar ka ri ka don ha ka jingma bad ka jingkhihwin ha India ha ki jylla bapher bapher ki Khristan kim lah shuh ban mane blei laitluid haba bun ki jaka la pynpra lut ïa ki ïingmane bad la beh lut ïa baroh kiba long Khristan.
Une u nongïalam Congress u la ong, lada ki paidbah ki jied ïa u kyrtong na u Prah, hangno un leit shong? Un leit ha ka Congress ne sha ka BJP namar u don marwei. Lada jied ïa ka UDP bad ka NPP hangno kin shong ha syndah u Modi bad ka BJP? Hynrei lada jied ïa ka Congress kan sa ïalam ïa ka sorkar ban ïoh ïa ka jingsynshar laitluid.
U Bah Prestone Tynsong uba long ruh u Symbud Myntri Rangbah ka Jylla u la ong, lada pynjop mynta ka kynti ïa ka Kong Ampareen Lyngdoh, ka NPP kan nang ïoh shuh ka bor bad kan nang pynkhlaiñ ïa ka sur ha dorbar Parliament.
U la kyntu ïa ki paidbah ba kim dei ban sngewthuh bakla ba kane ka ilekshon MP kan long kum ka ilekshon MLA ha kaba ka ilekshon MLA, MDC ka kut hapoh ka jylla hynrei ka MP da la jied ka dei ka kamram jong ki ban ïasaid ban ïakren ïa ki mat kum ka ILP bad ka ktien Khasi ba sahteng ha Delhi. Lada ki ai ka jingjop ïa ka Kong Ampareen Lyngdoh, kine ki mat baroh kin lah ban pynurlong ha kine ki snem ban wan.
Shuh shuh u la pynpaw ba ka Congress mynta ka la nang hiar ka la nang tlot ha kylleng sawdong ka ri India ha kaba ym don jingmut shuh ban ïakren bad ka Congress ha kane ka ilekshon MP, kim ïoh shuh wat tang 25 ngut ki MP bad ka la dei ka pali jong ka NPP ba ki paidbah kin ai ka jingkyrshan namar ba ka ïadon ha ka Sorkar ban ïasaid na ka bynta ka roi ka par ka bit ka biang jong ka jylla.
U la ong ruh ba ki don ki seng kiba dang shu kha 3 snem tam kiba leit sha u paidbah ban ong ba tang ma ki, ba lah ban kit ïa ka ri ka jaidbynriew bad bynrap da kaba ong, ko ki VPP baieid phi dang don tang lai snem ïaid shwa seh 10 snem 15 snem, phin sa kham ïoh ka jingshemphang naba kata ka dei kaba donkam hynrei ban shu sngewkhlaiñ than haba dang rit ka rta haba phi dang shu ïaid lynti 3 snem.
U la kyntu ïa ki paidbah ba wat ïa sngewthuh bakla, kine ki seng kiba dang lai snem mynta ki ong ba ki ieid ïa ka jaidbynriew bad ong, “Nga, nga ong ïa phi ba nga ruh kum u President ka NPP nga ieid ïa ka jaidbynriew hato don mo ba lah ban ïathew, don mo uba lah ban thew hapdeng ka VPP bad ka NPP katno ki ieid ïa ka jaidbynriew, nga shu ong to sngewbha da khan da kheiñ bha ba phin sngewthuh ïa u jingthew.”
U Bah Prestone u la ong ruh ba kynmaw bha ba kano-kano ka seng, uno-uno u kyrtong uba lap miet tang ban beiñ ïa kiwei pat, kaba mut u dei uba shukor ïalade.
“To sngewbha da khan kheiñ bha ba phin sngewthuh ïa u jingthew bad kynmaw ka nongrim ka seng thymmai ka long ban lynthem maw ïa u Prestone, ïa ka Ampareen bad ïa u Conrad ba dei ki nongtuh nonglute, phi kren beiñ katba mon kynnoh katba mon phin sa mad ka jingshisha,” la ong u Bah Prestone.
Katba ka Kong Aibandaplin Lyngdoh Nonglait na ka VPP ka la ong, ka jingsynshar ka dei ban ai ka jingshakri ban pynbiang ïa kita kiba ai ka bor ban shakri. Kum ki paidbah kim dei ban pynrit raiñ ïa lajong hynrei to tip ba phi don ka bor, ka shi ‘vote’ jong phi ban pynmih ïa ki nongmihkhmat sha ka jylla bad sa shisien wat ai ban pynmih ïa ki nongmihkhmat kiba thad khlemraiñ ïa ka jylla.
“Haba ngi don ïa ki nongshakri, kumno ki khlem lah ban shakri namar ha ka dor ki la ïapeiñ ïa ka hok ka jylla ha ka dor jong ka sbai bad ka rupa,” ka la ong.
Ka Kong Aibandaplin ka la ong, “Kaei kaba ngi bet ngi ïoh kheit ïa u soh uba hun bad dei tang ka jingsynshar kaba nyngkong ngi tieng ïa U Blei bad kaba ngi trei minot khop kaba ngi ngeit ha ka synshar-khadar kaba khuid.”
“Kham khraw ban ïa kata ka spah ba lum na ka bamsap bampong ka lah ka nongrim jong ka hok lada ngi kamai shispah ruh ka ïing ka long kaba phuhmut-phuhmat ka shispah ban ïa ka shi klur,” la ong ka Kong Aibandaplin.
