Nongpoh, Ïaïong 22
U Organising Secretary ka Voice of the People Party (VPP) Nongpoh konstitwensi, u Bah Aristone Manbha Ryndongsngi u la pynpaw ïa ka jingsngew-khia jur halor ka jingshah thad ka kyrteng ka jong u ryngkat bad ka seng lyngba ka WhatsApp ïa ka jingringdur jong ka jingshah kem u para jong u, kaba u la kynnoh ba la leh da kawei ka seng saiñ hima-sima khyndiat sngi shwa ka jingthep ‘vote’ ilekshon MP.
Utei u nongïalam ka VPP u la ong, ka jingshah kem u para jong u ha ki pulit ka Assam, ka dei hadien ba ha ka jingbym tip, u la thied ïa kawei ka thuk-thuk tuh kaba la wan die da uwei u samla uba la ïathuh ruh ba lyngba ka jingringdur ka khubor kaba la mih ha Assam, ki la don kiba la pynsaphriang ïa katei ka jingringdur ryngkat ka jingthoh ‘Shah kem u para trai jong u Bah Aristone Manbha Ryndongsngi, Organising Secretary ka VPP, Nongpoh Constituency uba kyrteng u Edelbert Ryndongsngi ha Assam ba tuh bike, kaba lyngngoh ka long ba kumno kata ka VPP ka sngewhok’.
U la ïathuh ba hashwa jong ka ilekshon, ka la don kawei ka seng saiñ hima-sima kaba la wan ban thong ïa u ba un pynïasoh ïalade. Hynrei na ka liang ka jong u, u la kyntait war ïa katei ka jingtyrwa bad u la don ka jingsuba ba ka dei kane ka seng saiñ-hima kaba la leh ïa kane ka kam ban pynthohbria ïa u, namar kane ka jingringdur ka la mih nyngkong na ka WhatsApp Group ka jong ki da kaba suba ruh ba lehse na ka daw ba kim lah ban thied ïa u, kumta ki la leh ïa kane ka kam ban pynthohbria ïa u.
U Bah Aristone u la buh jingkylli ba lada wat ka ïingbishar jong ka Guwahati kam pat rai pynrem la uta u para jong u dei ne em u nongtuh, kumno da maki, ki bym dei ki nongbishar ki nud ban pynbna ïa kum kane ka jingjia. U la ong ruh ba lada ki bahaïing jong kita kiwei ki seng ki la kylla angel lut baroh, kan bha ïa ki ba kin kynnoh bad lada kim dei ki angel, ka jingleh ka jong ki kan kyrtoh ruh sha ka ïing ka sem ka jong ki.
U la pyntip ruh na ka liang ka jong u, u la dep ban ai jingujor ha ka Cyber Crime ban leh ïa kaba donkam bad khmih lynti ha kine ki khyndiat sngi yn sa lap ïa kito kiba donkti da kaba ong ba lada kito ki briew kiba donkti ban shna ïa kane ka jingrindur ki kwah ban ïasuk noh ki lah ban phone ïa u ban ïakren ïasuk bad lada ki kwah ban ïaid shalor katkum ki kyndon aiñ ruh, u long uba la pynkhreh bad pyntip ruh ba u la dep ban ïakren bad u President ka VPP halor kane ka bynta.
U Bah Aristone u la ong, lada dei ba ktah tang ïa u shimet, um da sngewpher than, hynrei kane ka jingpynsaphriang ka la pynsngewsih shikatdei ïa ka kmie ka jong u, khamtam ba ka don jingshitom klongsnam bad tang shu sngewsih kam lah shuh ban ring mynsiem, bad kane ka pynlong ïa u ba um banse ban mih shakhmat ban pynshai halor kane ka jingjia.
Shuh shuh u la ong ruh ba lada kita ki briew ki kwah eh ban pynpaw nam ïa u ne ïa ka ïing ka sem ka jong, ki la shna ruh ïa ki ‘video’ halor jong u bad ki para ki jong u ruh kumjuh halor ki kam kiba la leh ban wanrah nam ïa ka Ri Bhoi District bad ka jylla da kaba pyntip ba ma u, u la dep ban lap bad pynithuh sha ka pyrthei uwei u kynja doh uba la ai kyrteng ‘Chana Aristonei’ bad ki ar ngut ki para ki jong u ruh, uwei u dei uba la ïoh Gold Medalist ha ka Muay Thai bad uwei pat u dei uba la long lahduh ha ka Weightlifting.
Katba u Bah John Frankie Rymbai uba dei u nongkyrshan ka VPP, u la pynpaw ïa ka jingsngewkhia halor ka jinghiar dor ka saiñ hima-sima kat haduh ba hap ban kynthoh wat ïa ka kam ïing kam sem lane ka kam shimet jong uno-uno da kaba kyrpad ba kum kane ka rukom ïalap ilekshon kam ïahap satia. Namar kata, u kyntu ai ba ka jingïalap ilekshon nangne shakhmat kan dei halor ki nongrim bad ki rukom trei kam jong ka seng kaba ki don ym ban kynthoh shimet wat ïa ka kam ïing kam sem ne ka jinglong shimet jongno-jongno naba kane ka pynhiar dor bad kam ïahap satia naba baroh hi lada wad ïa ka jingshisha, ki dei kiba don jingduna suda la ka dei ha ki shimet ne ha ka longïin- longsem ka jong ki ruh kumjuh.
