Shillong, Ïaïong 24
U Myntri ka tnat Ri Jingri ka Sorkar jylla uba dei ruh u nongïalam ka BJP, Bah Alexander Laloo Hek, u la ong ba namar ba ka BJP ka khlem pynïeng kyrtong ha kane ka ilekshon MP Lok Sabha ba dang shu dep napoh ka jylla bad kumta u la kham laitluid ka por bad ym donkam ban leit sharum-shaneng ban leit ïalap ilekshon.
Haba ïakren bad u nongthoh khubor, u Bah Hek u la ïathuh ba kum u nongmihkhmat ka Pynthorumkhrah Constituency, u la ïoh ruh ban pynlong jingïalang saw tylli bad ki nongkyrshan ka BJP bad sha kiwei ki jaka kum ha North Shillong bad Nongthymmai constituency.
U Bah Hek u la ong ha kaba ïadei bad kane ka ilekshon MP ka long kaba eh ban batai namar ba ka don ka jingïakhun ha ki lai tylli ki seng kiba kynthup ïa ka NPP, VPP bad ka Congress. U la ong ruh ba hapoh ka constituency jong u ki nongïalam ki la ïatrei shitom na ka bynta ka NPP bad kyrmen ba kan bha katkum ki jingtrei shitom.
Ha kaba ïadei bad ka jingshongshit ka lyer bad ka shap u Prah, na ka liang u Bah Hek u la ong ba kane kajuh ka rukom ka la jia ruh ha ka por ba dang don ka seng KHNAM. Kumta kiba kum kine ki jait umsaw kin wan beit hi shisien lano.
Shuh shuh u Bah Hek u la ïathuh ruh ba ki paidbah hapoh ka constituency ki ud namar bym ïeng hi da u kyrtong jong ka BJP kumta ha kane ka kynti kin kyrshan kat ïa uba ki mon.
U la pyntip ruh ba ka jingbym pynïeng kyrtong ka BJP ha Meghalaya ka long ban kyrshan ïa u kyrtong ka NDA kaba ha Meghalaya ka dei ka NPP, kumjuh ruh lada don ki constituency kiba khlain ka BJP ki paralok NDA ki hap ban kyrshan ïa ka BJP.
“Mynshwa ka BJP ka la kyrshan ïa u kyrtong ka UDP ha ka por ba ka don ha ka sorkar hynrei u khlem jop bad mynta ka dei ka sien kaba ar ba ka BJP ka khlem pynïeng kyrtong ban kyrshan ïa ka NPP” u la ong.
U don jingkyrmen ba ka NPP kan jop mynta namar ka la ïapher ka rukom pyrkhat mynshwa bad mynta.
Halor u kyrtong ka UDP, u Bah Hek um da ïohi than ba un khlaiñ hynrei um tip pat sha kiwei ki jaka tangba ha ka saiñ pyrthei um nud ban kheiñ sting ïano-ïano.
