Shillong Ïaïong 25
Ka samla kaba la pynpaw pyrthei ïa ka jingshah leh be-ijot ha 4 ngut ki briew, ka la shah kren pyndom (troll) ha ‘social media’ ha ryngkat ki jingshna dur bun rukom.
Ki pulit ki la dep kem lai ngut ki briew kynthup ïa uwei uba dang rit rta.
La ong ba uta uwei uba dang rit rta la shim katkum ka rta jong u ha ka por ba jia kane ka jingleh be-ijot ïa ka samla, hynrei mynta um dei shuh uba dang rit ka rta.
Ka samla kaba ngat ha kane ka apot ka la pynpaw pyrthei ïa kane ka jingshah leh dusmon ïa ka hadien ba kita ki nongleh kam runar ki la pynsaphriang ïa ka dur khih ba shah leh be-ijot ma ka kaba la jia naduh mynshem snem.
Wat lada ka jingjia ka la jia la kham katto-katne bnai ha u snem 2023, hynrei ka samla ka la ujor ejahar mynta u bnai Ïaïong ynda ka la ïoh jingtip ba ka dur khih ba shah leh be-ijot ka la saphriang.
Haba ïakren bad ki pulit ophisar ki la ïathuh ba kane ka dei ka kam runar kaba shyrkhei bad ka bym lah ban pdiang ha ka imlang-sahlang.
Kumta ka jingtohkit ka dang ïaid ban lap ïa ki briew kiba donkti ha kane ka kam runar khamtam ban thad khlemraiñ ïa ka longrynïeng jong kiwei da kaba pynphriang ïa ka dur khih.
“Haduh mynta la dep kem ïa lai ngut ki briew bad dang ap ban ïoh kem shuh ïa kiba donkti,” la ong u pulit ophisar.
Ha social media, kum ha Facebook ki don ruh kiba kren pyndom haba ïadei bad kane ka jingjia da kaba pynwandur ïa ka jingïalehkai English Premier League hapdeng ki ar tylli ki klob ba paw ka England, nalor ki jingkren kynthoh kum ka jingbuh jingkylli ïa kata ka jingjia.
La don ruh ka jingshna dur kaba pynlong kamkai ïa kane ka jingjia da kaba pyni ïa ka dur u jingbam maggi, ka kynja jingdih breezer, scooty bad PUBG.
