Jowai, Ïaïong:
Ki khynnah skul ka Rud Myntdu LPS SSA ha ka Sngi Balang ki la mih surok ban ïalap sha ki paidbah nongleit nongwan halor ka jingsniew ka jingpyndonkam ïa u sikret bad duma.
Ha kane ka jingmih surok ki khynnah skul la synran lang da ki nonghikai ryngkat ka jingrah lang ïa ki ‘placard’ ba la thoh ïa ki dur ki dar kiba long shibynta ban khring ïa ka pyrkhat pyrdaiñ jong ki paidbah nongleit nongwan.
Kane ka dei ka prokram kaba hap ban pyndep da baroh ki jaka pule hapoh ka jylla halor ka thong jong ka ‘World No Tobacco Day 2024’ katkum ka hukum na ka ïing treikam State Project Director, SSA & Director of School Education and Literacy, Meghalaya Shillong.
Ïa kane ka prokram da kawei ka kyntien la tip ïa ka kum ka Rally against Tobacco ryngkat ka Signature Campaign halor ka phang “My Meghalaya, Tobacco Free Meghalaya”.
