Shillong, Ïaïong 25
U Chairman ka Election Campaign jong ka National People’s Party (NPP) na Shillong Parliamentary Constituency, Bah Hamlet Dohling uba dei ruh u MLA barim ka Mylliem, u la ong ba ka BJP ka wan ban kyrshan hi ïa ka seng NPP, hynrei ka NPP kam shym la shaniah ïa ka ‘vote’ tang na ka BJP, hynrei ka hap ban trei shitom.
Haba kylli hadien ba la dep thep ‘vote’ ki paidbah ha ka 19 tarik mynta u bnai, u Bah Hamlet u la ong ba ka jingïakhun ka long hapdeng ki lai tylli ki seng saiñpyrthei kata ka Kong Ampareen Lyngdoh na ka NPP, Bah Vincent Pala na ka Congress bad u Dr. Ricky A.J Syngkon na ka VPP.
U Bah Hamlet u la ong ba kiwei ki seng saiñpyrthei ki lah ban kob ïa ka jingjop, hynrei ka NPP kan ap beit haduh ka 4 tarik Jylliew kaba dei ka sngi ban ñiew ‘vote’.
Halor ka jingmih ki khubor ba ki don ki nongkyrshan BJP kim shym la treh ban thep sha ka NPP, u Bah Hamlet u la ong ba ka BJP ka wan tyrwa hi ban kyrshan ïa ka NPP, hynrei haba ka seng ka wan ban kyrshan kim lah ban kyntait.
Katkum ka jingbatai u Bah A.L Hek uba dei u MLA ka BJP na Pynthorumkhrah constituency ki don ki nongkyrshan kiba kohnguh ban thep ïa ka NPP bad don ki bym kohnguh namar ki shim ba ka BJP ka khlem ïakhun hi kin thep katba ki mon.
