Shillong, Ïaïong:
Kawei ka dukan ja kaba la shah pynkynriah shipor na kawei ka ïing paki dulan kaba don ha Umsohsun, Shillong namar ka jingpynpra ïa ka jaka ïeng taksi Jaïaw ka la hap khang noh namar bym don briew ban wan bam.
Katba ka dukan ja ba bang shi kat dei ka dohkhlieh syrwa masi kaba don hajrong ka ïing ba la pynkhreh da ka tnad Municipal wat la duna ki briew ba wan bam ka dang neh satar.
Kane ka jaka ïeng taksi Jaïaw la sdang ban pynpra naduh u Naiwieng 2023 hadien ba la dep pynkynriah ïa kiba die jaiñ kaba la tip kum ka Khasi Market bad ki dukan kiba don hajrong.
Wat lada kane ka jingpynpra ka la ïaid mynta la hynriew bnai, hynrei haduh u Ïaïong mynta u snem kam pat don dak eiei ban pynïeng païa.
Haba ïoh ban ïakren bad u trai dukan dohkhlieh syrwa u Bah Donlystar Marbaniang u la pynpaw ka jingsngewsih namar ka jingslem ka sorkar ban shna ïa ka jaka ïeng kali thymmai wat lada la dep pynpra mynta la 6 bnai.
U la ïathuh wat la kam ïaid ka dukan, hynrei ki hap shong satar namar bym ïoh dukan shawei.
U la ïathuh ha ka por ba ki dang shong die ja bad ka dohkhlieh masi syrwa ha khrum jingkieng Motphran ki lah ban die haduh san tylli ki khlieh masi ha ka shisngi. Pynban ynda la pynkynriah sha jaka ïeng taksi Jaïaw ka la sdang hiar bad lah ban die tang 2 tylli shiteng ki khlieh masi ha ka shi sngi bad hajrong ka ïing mala ha Umsohun kam ïaid shuh tang ar kilo ruh ka khlieh masi.
U la pyntip haba nyngkong ki bor pynïaid ka Municipal ki ong ban pyndep shna ïa kane ka ïew thymmai hapoh 11 bnai, hynrei mynta la ïaid 6 bnai ym pat don dak eiei.
Shuh shuh u la ïathuh ba ki don ki para ba wan shong die dukan hajrong ka ïing mala ki la khang noh namar bym da ïaid ïew namar ka jingjngai ka lynti.
Namar kata, u la kyntu ïa ka sorkar ba kan shna kham kloi ïa kane ka jaka ïeng kali khnang ban nym ktah ïa ka kamai kajih jong ki.
