Shillong, Ïaïong 25
Ka bynta kaba ar jong jingjied ïa ki MP sha ka Dorbar Lok Sabha kan long ha ka Sngi Thohdieng ha ki 88 tylli ki konstitwensi ha ki 13 tylli ki jylla ha kaba ki nongthep ‘vote’ ki don kumba 16 klur ngut.
Lah ban kdew ba ka bynta banyngkong jong ka ilekshon MP ka la long ha ka 19 tarik Ïaïong ha ki 102 tylli ki konstitwensi ba kynthup ïa ka Shillong bad Tura.
Ha ka Sngi Palei ka Election Commission jong ka Ri India (ECI) ka la kyntu ïa ki paidbah ha kitei ki 88 tylli ki konstitwensi ba kin ïa mih ban jied ïa ki MP. Ïa ka jingthep ‘vote’ na ka bynta ka 29-Betul Parliamentary Constituency ha Madhya Pradesh la hap ban rah sha ka bynta kaba lai namar ka jingkhlad noh jong u kyrtong ka seng Bahujan Samaj Party.
Ka ECI ka la ong ba ka jingthep ‘vote’ lashai ka sngi kan long naduh 7 baje mynstep haduh 6 baje janmiet bad ka por ban khang ïa ka jingthep ‘vote’ kan shong na kawei ka konstitwensi sha kawei pat. Ïa ka jingthep ‘vote’ ha ki konstitwensi ha Bihar kum ka Banka, Madhepura, Khagaria bad Munger la pynjlan shaduh ka 6 baje janmiet khnang ban ailad ïa ki paidbah ba kin mih ban jied MP hapdeng ka jingjur jong ka jingshit ka suiñ bneng.
Ban pynïaid ïa ka ilekshon, kin don palat 16 lak ngut ha ki 1.67 lak tylli ki Polling Station.
Ki 88 tylli ki konstitwensi ban thep ‘vote’ lashai ka sngi ki long baroh 20 tylli na Kerala, 14 na ka 28 tylli ha Karnakata, 12 na Rajasthan, mar phra ha Maharashtra bad Uttar Pradesh, hynñiew ha Madhya Pradesh, mar san ha Assam bad Bihar, mar lai ha Chhattisgarh bad West Bengal, bad mar kawei ha Manipur, Tripura, bad Jammu and Kashmir.
Ki nongïakhun ha kane ka bynta kaba ar kiba kham paw ki long u nongïalam ka Congress na Wayanad, u Rahul Gandhi, u Shashi Tharoor na Thiruvananthapuram, u nongïalam ka BJP na Karnataka, u Tejasvi Surya nalor kiwei pat.
