Shillong, Ïaïong 25
Ki pulit ka South Garo Hills district ha ka step synñia jong ka Sngi Palei ki la leit ban khlong ïa ki kuli kumba 340 tylli ha ryngkat ki synduk buh kuli kiba la tep shapoh khyndew na kawei ka khlaw kaba don ha shnong Chibokgre kaba hap ha Thanat Chokpot.
Kine ki kuli ki dei kiba la buhrieh da kaba tep shapoh khyndew ha ryngkat ki synduk buh kuli.
Ka khubor na ki pulit ka ïathuh ba ki pulit ki la leit sha kane ka jaka hadien ba la ïoh ka jingtip kaba tikna ba ka don ka jingbuhrieh ïa ki kuli da ki suba lehnoh.
Ka kynhun ki pulit kaba lamkhmat da u SDPO ka Chokpot ka la leit ha ka por 1.15 baje step phyrngab sha katei ka jaka kaba la suba ba la buhrieh ïa ki kuli bad ynda la wad ki la lap ïa ka jaka kaba tep ïa ki kuli ha ka por kumba 3.27 baje mynstep.
La ong ba kine ki kuli ki don kumba 340 tylli kiba pyndonkam ban siat ïa ki liengsuiñ ha kaba lap lang ruh saw tylli ki synduk kiba don ki kuli ha kane ka jaka.
Ïa kane ka kynhun la synran lang da u Circle Inspector Sadar, OC ka Thanat Chokpot, I/C BDDS bad 3 ngut ki pulit.
Na ka liang ki pulit ophisar ka Jylla naduh u DGP ki la ai khublei bad ai jingïaroh ïa kane kynhun kaba la lah ban pyndep ïa kane ka kam bah kaba long ka jingshngaiñ ïa ka imlang-sahlang.
